Қазақстанда мемлекеттік көмек алушыларды АИ көмегімен айқындай бастайды

Тиісті жоспарларды Еңбек және әлеуметтік қорғау министрі Асқарбек Ерсаев Үкімет отырысында жариялады.

Оның айтуынша, мұндай тетік әлеуметтік қолдаудың Бірыңғай цифрлық платформасында жұмыс істейтін болады, онда қазақстандықтар әкімдіктерден 13 қолдау шарасын ала алады.

Министр сондай-ақ тамыз айынан бастап әкімдіктер көрсететін мемлекеттік қолдаудың біржолғы шаралары, оның ішінде мерекелік және айтулы күндерге төлемдер АИ көмегімен тағайындалатынын атап өтті.

"Жүйе алушыларды алдын ала анықтап, тағайындау жобасын қалыптастыратын болады. Төлемді жүзеге асыру туралы түпкілікті шешімді жергілікті орган қабылдайды. Қыркүйек айында eGov Mobile арқылы өтініш беру мүмкіндігін қамтамасыз ету жоспарлануда. Қазан айында азаматтардың атаулылығы мен қажеттілік дәрежесін ескере отырып, мемлекеттік қолдау шараларын мақсатты тағайындау үшін жасанды интеллект енгізу жоспарлануда", - деді Еңбек министрлігінің басшысы.

Айта кетейік, маусым айынан бастап азаматтар құжаттарды өз бетінше жинамай және мемлекеттік органдарға бармай-ақ мемлекеттік қолдау шараларын алушылар бола алады.

"Енді бір өтініш беру жеткілікті: платформа қажетті мәліметтерді мемлекеттік ақпараттық жүйелерден алады. Осыдан кейін шешім қалыптасып, төлем қамтамасыз етіледі", - деп еске салды министр.

Қазір платформа арқылы келесі 13 әлеуметтік көмек шаралары қол жетімді:

1. емдеуге (сауықтыруға);
2. гемодиализ аппаратын пайдаланатын I топтағы мүгедектігі бар адамдарға;
3. тірек-қимыл аппаратының ауруларын емдеуге;
4. мүгедек балаларды емдеуге;
5. созылмалы бүйрек жеткіліксіздігінен зардап шегетін адамдарға;
6. дәрілік заттармен қамтамасыз етуге;
7. санаторий-курорттық емдеуге;
8. коммуналдық қызметтерді төлеуге;
9. тұрғын үйді ұстауға;
10. телефон үшін абоненттік төлемді төлеуге;
11. тұрмыстық қажеттіліктерге;
12. қатты отын сатып алуға;
13. ақшалай көмек түрінде.