Олжас Бектенов "Заң және тәртіп" қағидатын енгізу бойынша ВАК кеңесін өткізді

"Мемлекет басшысы өткен жылдың соңында "құқық бұзушылықтың алдын алу туралы" Заңға қол қойды, оған сәйкес құқық бұзушылықтың алдын алу субъектілерінің тізбесі және құқық бұзушылықтың алдын алу жөніндегі ведомствоаралық комиссияның құрамы кеңейтілді. Жалпыхалықтық референдумда қабылданған Конституцияда құқықтық мемлекетті нығайтуға, қоғамдық қауіпсіздікті және құқық бұзушылықтарға "нөлдік төзімділікті" қамтамасыз етуге бағытталған "заң және тәртіп" қағидаты негізгілердің бірі болып бекітілді. Заңнамалық жаңалықтардың бірі барлық мемлекеттік органдарды, азаматтарды және жергілікті қоғамдастықты құқық бұзушылықтың алдын алу жөніндегі жұмысқа тарту болып табылады. Бұл біздің ортақ міндетіміз",-деп атап өтті Премьер-министр.

ІІМ мәліметтері бойынша, іске асырылып жатқан шаралар қазірдің өзінде әсер етуде: қылмыс деңгейі өткен жылдың қорытындысы бойынша 6% - ға және 2026 жылдың бірінші тоқсанында тағы 9% - ға төмендеді. Елімізде байланыс абоненттерін биометриялық сәйкестендіру енгізілді, интернет-алаяқтыққа қарсы күрес күшейтілді, Дербес деректер саласындағы заңнама қатаңдатылды, сталкинг және некеге тұруға мәжбүрлеу үшін қылмыстық жауапкершілік енгізілді, сондай-ақ бұрын сотталған адамдарды бақылау үшін электрондық білезіктерді қолдану тәжірибесі кеңейтілді.

Азаматтарды құқықтық ағарту бойынша қабылданып жатқан шаралар туралы Премьер-Министрдің орынбасары – Мәдениет және ақпарат министрі Аида Балаева баяндады. Ақпараттық жұмыс заңнама нормаларын түсіндіру, құқық бұзушылықтардың алдын алу, алаяқтық пен сыбайлас жемқорлыққа қарсы күрес сияқты бағыттар бойынша жүргізіледі.

Отырыста киберқауіпсіздік және цифрлық қылмыстарға қарсы іс-қимыл мәселелеріне ерекше назар аударылды.

"Киберқылмыскерлер заманауи цифрлық технологияларды жиі пайдаланады. Интернет-алаяқтыққа қарсы неғұрлым пәрменді шаралар қажет. ІІМ мүдделі мемлекеттік органдармен бірлесіп алаяқтық транзакцияларды бұғаттау, сондай-ақ мемлекеттік органдар мен банктер арасында жалған сауда орталықтарын анықтау бойынша деректер алмасу тетіктері бойынша қосымша ұсыныстар енгізуді тапсырамын. "Цифрлық полицей" жобасын енгізуді жеделдету, сондай - ақ киберволонтерлік практиканы және кадрлар даярлауды кеңейту", - деп атап өтті Олжас Бектенов.

Оң динамикаға қарамастан, бірқатар өңірлерде қауіпсіздік инфрақұрылымын дамытуға, полиция пункттерін салуға және жаңғыртуға, сондай-ақ цифрлық шешімдерді енгізуге байланысты проблемалық мәселелер сақталуда. Әкімдіктерге егжей-тегжейлі талдау жүргізу және ағымдағы жылы барлық жоспарланған іс-шаралардың толық орындалуын қамтамасыз ету тапсырылды.

Әлеуметтік блокта рақымшылық жасау қарсаңында бұрын сотталған адамдарды қайта әлеуметтендіруге, отбасылық-тұрмыстық зорлық-зомбылықтың алдын алуды күшейтуге және психологиялық көмекті кеңейтуге баса назар аударылды. Денсаулық сақтау министрлігіне зорлық-зомбылыққа бейім адамдар үшін түзету бағдарламаларын қамтуды ұлғайту, сондай-ақ дағдарыс орталықтары қызметтерінің қолжетімділігін арттыру, ал жергілікті атқарушы органдарға ведомствоаралық өзара іс-қимылды күшейту тапсырылды.

Отырыс қорытындысы бойынша Үкімет басшысы "заң және тәртіп" қағидаты Конституцияның нормасы ғана емес, сонымен қатар азаматтардың күнделікті өмірінде қауіпсіздік пен құқықтық тәртіпті қамтамасыз етудің нақты құралы болуға тиіс екенін атап өтті.