Қазақстан ТЖМ арнайы газ инспекциясын құрмайды

Министрлер кабинеті басшысының Мәжіліс депутаттарының сауал салуына берген жауабында ТЖМ базасында мамандандырылған газ инспекциясын құру орынсыз болып көрінетіні айтылған, өйткені қолданыстағы мемлекеттік реттеу жүйесі өкілеттіктерді уәкілетті органдар арасында бөлуді көздеп отыр, ал жеке құрылым құру функциялардың қайталануына, бекітілген жауапкершіліктің әлсіреуіне және қосымша әкімшілік жүктемеге әкеп соғуы мүмкін. 

Депутаттарға берген жауабында Бектенов тұрмыстық баллондарды сұйытылған мұнай газымен толтыруға өнеркәсіптік, техникалық және өрт қауіпсіздігі талаптарына сәйкес келетін мамандандырылған газ толтыру станциялары мен пункттерінде ғана рұқсат етілгенін атап өтті.

"Бұл талаптарды бұзғаны үшін ҚР Әкімшілік құқық бұзушылық туралы Кодексінің 170 — бабына сәйкес әкімшілік жауапкершілік қарастырылған", - деп түсіндірді Үкімет басшысы.

Ол ӘҚБтК-нің 170-бабының 3-тармағына сәйкес тауарлық немесе сұйытылған мұнай газын есепке алу және өткізу тәртібін бұзу кәсіпкерлер үшін айыппұл салуға әкеп соғатынын нақтылады. Шағын бизнес субъектілері үшін айыппұл 75 АЕК, орта бизнес үшін — 150 АЕК, ал ірі кәсіпкерлік үшін — 700 АЕК құрайды.

Газ баллондарының мемлекеттік тізілімін және оларды таңбалау жүйесін, сондай-ақ цифрлық бақылау құралдарын енгізу туралы айта келе, Бектенов 2025 жылы Энергетика министрлігі сәйкестендіру құралдарын пайдалана отырып, тұрмыстық баллондарда сатылатын сұйытылған мұнай газын таңбалау және қадағалау бойынша пилоттық жоба жүргізгенін хабарлады.

Пилоттық жобаның қорытындысы бойынша бірқатар түзетулер дайындалды, олар бойынша қазір реттеушілік әсерге талдау жүргізілуде. Осы рәсім аяқталғаннан кейін міндетті таңбалауға жататын тауарлардың тізбесіне өзгерістер енгізу жоспарлануда.

Сондай-ақ, халықтың хабардарлығын арттыру үшін naqty Onim мобильді қосымшасының функционалдығын кеңейту көзделген. Ол арқылы азаматтар газ баллондарының түпнұсқалығын тексере алады, оларды техникалық куәландыру мерзімдері туралы мәлімет ала алады, анықталған бұзушылықтар туралы хабарлай алады және ресми айырбастау пункттерін таба алады.

Сонымен қатар, Бектенов қазіргі уақытта Үкімет өнеркәсіптік қауіпсіздік саласындағы мемлекеттік инспекторларға лауазымдық жалақының 70% - на дейінгі мөлшерде үстемеақы белгілеу мәселесін пысықтап жатқанын айтты.

Инспекторлардың штат санын ұлғайтуға келетін болсақ, бұл мәселе мемлекеттік аппаратты кеңейтуге мораторий аяқталғаннан кейін қаралатын болады.

Премьер газ және газбен жабдықтау саласындағы қауіпсіздікті қамтамасыз ету мәселелері уәкілетті органдар мен Үкіметтің тұрақты бақылауында екенін атап өтті.