Қазақстанда инватакси алудың бірыңғай ережелері енгізіледі

Құжат мүгедектігі бар адамдар үшін Көлік қызметтерінің қолжетімділігін арттыруға, тасымалдауды ұйымдастыруды жетілдіруге, сондай-ақ қазіргі заманғы жағдайларды ескере отырып, жекелеген талаптарды өзектендіруге бағытталған. Инватакси қызметтерін көрсету бөлігінде оларды ұсыну үшін негіздерді жүйелеу және нақтылау ұсынылады.

Ол үшін инватакси қызметін алуға құқық беретін медициналық айғақтардың тізбесі бекітілетін жеке қосымша енгізіледі. Бұл осы қызметтерді алушыларды анықтау кезінде бірыңғай тәсілді қамтамасыз етуге мүмкіндік береді.

Инватаксиге сапардың ұзақтығын анықтау бойынша жергілікті атқарушы органдардың өкілеттіктері кеңейтілуде. Мұндай тәсіл халықтың қажеттіліктерін ескере отырып, неғұрлым икемді реттеуді қамтамасыз етеді. Сондай-ақ, 18 және одан жоғары жастағы мүгедектігі бар адамдарды жеке көмекшілердің сүйемелдеу мүмкіндігі бекітіледі.

Сонымен қатар, жолаушыларды автомобиль көлігімен тасымалдау ережелеріне өзгерістер енгізілуде. Қоғамдық көлікте балалар арбаларын тасымалдау шарттары жоғары жүктеме кезінде нақтыланады, сондай-ақ автобустарда маршруттық көрсеткіштерді ресімдеуге қойылатын талаптар өзектендіріледі.

Конкурстық рәсімдерді жетілдіру шеңберінде тасымалдаушыларды бағалаудың қосымша өлшемшарттарын енгізу көзделеді. Атап айтқанда, электр және гибридті қозғалтқыштары бар автобустарды қоса алғанда, экологиялық таза көлікті пайдалану ынталандырылады. Бұл жылжымалы құрамды жаңартуға және қоршаған ортаға әсерді азайтуға бағытталған.

Бұдан басқа, өңірлердегі автовокзалдардың атаулары мен орналасқан жерлерін нақтылай отырып, тексеру жүзеге асырылатын көлік инфрақұрылымы объектілерінің тізбесі өзектендіріледі.

Бұйрықтың жобасы 2026 жылғы 8 сәуірде "Ашық НҚА" Ашық нормативтік құқықтық актілердің интернет-порталында орналастырылды.