Қазақстан тауық жұмыртқаларын импорттауға тыйым салуды жарты жылға ұзартты

Тиісті шешім Премьер-Министрдің орынбасары – Ұлттық экономика министрі Серік Жұманғариннің төрағалығымен Үкіметтегі ведомствоаралық комиссия отырысының қорытындысы бойынша қабылданды.

Талқылау қорытындысы бойынша комиссия картоп экспортына уақытша тыйым салуды енгізу тиімсіз деп тапты. Мұндай шешім ішкі нарықтағы бағалардың тұрақтануын және өнімнің жеткілікті қорларының болуын ескере отырып қабылданды.

Сондай-ақ, квота алу үшін сиыр эксп экспорттаушыларға қойылатын талаптарды жеңілдету туралы шешім қабылданды. Қазір ережелер кем дегенде 5 мың басқа арналған жеке бордақылау алаңының және жеке ет комбинатының болуын қарастырады. Ауыл шаруашылығы министрлігі квоталарды бөлудің қолданыстағы тәртібіне өзгерістер енгізеді.

Бұл ретте Қазақстаннан ірі қара мен ұсақ малдың аналық басын, сондай-ақ ІҚМ бұқашықтарын әкетуге тыйым салу ұзартылады. Шектеу, оның ішінде Еуразиялық экономикалық одақ елдеріне қатысты қолданылатын болады. Бұл шара аналық мал басын сақтауға және отандық өңдеу кәсіпорындарын шикізатпен қамтамасыз етуге бағытталған.

Бұдан басқа, алты айға тауық жұмыртқаларын, оның ішінде ЕАЭО елдерінен импорттауға тыйым салынады. Кабинетте атап өткендей, Қазақстанда 70 құс фабрикасы жұмыс істейді, оның 34 – і жұмыртқа өндіруге, 29 – ы құс етіне, 7-і асыл тұқымды репродукцияға маманданған. 2025 жылдың қорытындысы бойынша тауық жұмыртқасының өндірісі 2,4% - ға өсіп, 4,57 млрд дананы құрады. Ішкі нарықтың өз өндірісі есебінен қамтамасыз етілуі 98% - ға жетеді. Тиісті бұйрықты ауыл шаруашылығы министрлігі дайындайды.

Комиссия сондай-ақ теміржол жылжымалы құрамы мен теміржол төсемінің элементтері үшін құрамдас бөліктерді үшінші елдерден импорттауға тыйым салу туралы мәселені қарады. Талқылаудан кейін қатысушылар мұндай шектеулердің орынсыздығы туралы қорытындыға келді.

Сонымен қатар, "Қазақстан темір жолы" АҚ отандық өндірушілерден теміржол инфрақұрылымының құрамдас бөліктері мен элементтерін сатып алу басымдығын қамтамасыз етуді тапсырды.