Қазақстан мен Қытай арасындағы QR-төлемдер жыл соңына дейін біріктіріледі

Сапар барысында қазақстандық делегация Қытай Халық банкінің, ҚХР Ұлттық Қаржылық реттеу басқармасының, Қытай банктер қауымдастығының, ірі қытайлық коммерциялық банктердің және cross-Border Interbank Payment system (CIPS) компаниясының басшылығымен кездесті.

Валюталық своп туралы келісім

Сапардың басты қорытындыларының бірі Қазақстан Ұлттық Банкі мен Қытай Халық Банкі арасындағы валюталық своп туралы келісімге қол қою болды. Құжат тараптардың өзара келісімі бойынша одан әрі ұзарту мүмкіндігімен үш жыл мерзімге жасалды.

Валюталық своп тетігі орталық банктерге ұлттық валюталардағы өтімділікке қол жеткізуге мүмкіндік береді. Бұл екі елдің қаржылық ынтымақтастығын нығайтады, сауда мен инвестицияларды дамыту үшін қосымша жағдайлар жасайды, сондай-ақ өзара есеп айырысу кезінде теңге мен юаньды пайдалануды кеңейтеді деп күтілуде.

Цифрлық теңге мен цифрлық юань пилоттық режимде сыналады

Тағы бір маңызды шешім цифрлық теңге мен цифрлық юаньды пайдалана отырып есептеулер жүргізу жөніндегі пилоттық жобаны іске қосу туралы уағдаластық болды.

Сонымен қатар, тараптар Орталық банктердің цифрлық валюталарын дамытуды, төлем инфрақұрылымын жетілдіруді және банк секторын реттеу саласындағы одан әрі ынтымақтастықты талқылады.

Қазақстан мен Қытай арасындағы QR-төлемдер жыл соңына дейін біріктіріледі

Келіссөздер сонымен қатар азаматтар мен бизнес үшін трансшекаралық есептеулерді ыңғайлы ету үшін ұлттық төлем инфрақұрылымын дамыту бойынша келісімдерге қол жеткізді.

2026 жылдың соңына дейін Қазақстанның ұлттық төлем корпорациясы мен UnionPay International (UPI) халықаралық төлем жүйесі екі елдің QR-төлемдерін қабылдау жүйелерін біріктіреді деп жоспарлануда. Бұл Қытайдағы қазақстандық туристер мен кәсіпкерлерге де, Қазақстандағы қытайлық пайдаланушыларға да QR-код бойынша сатып алуларды төлеуге мүмкіндік береді.

Ұлттық валютадағы есеп айырысу оңайырақ болады

Қытай юанімен халықаралық есеп айырысуды қамтамасыз ететін CIPS компаниясының басшылығымен кездесуде Қазақстан Ұлттық Банкі, ұлттық төлем корпорациясы және CIPS арасындағы ынтымақтастық туралы бұрын қол қойылған Меморандумды іске асыру талқыланды.

Тараптар ұлттық валютадағы есептерді кеңейтуге, трансшекаралық төлем инфрақұрылымын дамытуға және халықаралық төлемдер саласындағы өзара іс-қимылды нығайтуға ниетті.

Қытайлық банктерге Қазақстандағы жұмысын кеңейту ұсынылды

Қытайдың ірі банктерінің – Қытайдың өнеркәсіптік-коммерциялық банкінің (ICBC), Қытай банкінің, Қытайдың ауылшаруашылық Банкінің және Қытайдың құрылыс банкінің басшыларымен келіссөздер барысында Қытайдың қаржы институттарының Қазақстандағы инвестициялық жобаларды қаржыландыруға және борыштық құралдарды шығаруға қатысуы талқыланды.

Қазақстандық тарап елдің негізгі макроэкономикалық көрсеткіштерін ұсынды, инвестициялық ахуал және банк заңнамасындағы өзгерістер туралы айтып берді, сондай-ақ Қытай банктеріне еншілес ұйымдарды ашу арқылы Қазақстанда өзінің қатысуын кеңейтуді ұсынды.

Қытайдың өнеркәсіптік-коммерциялық банкі мен Қытай Банкі қазірдің өзінде Алматыда жұмыс істеп жатқаны және Тараптар олардың Қазақстан экономикасын қаржыландыруға қатысуын арттыруға мүдделі екендігі жеке атап өтілді.

Сонымен қатар, Қазақстан қаржыгерлерінің қауымдастығы мен Қытай банктерінің қауымдастығы ынтымақтастық туралы Меморандумға қол қоюға келісті.

Alatau City инвестициялары мен АИ саласындағы жобалар талқыланды

Сапар барысында қазақстандық делегация қытайлық серіктестерді Alatau City инвестициялық жобаларын іске асыруға және оның қаржылық экожүйесін дамытуға қатысуға шақырды.

Қытай тарапына цифрлық қаржы және жасанды интеллект саласындағы жобалар, сондай-ақ халықаралық инвесторларды тарту үшін жаңа мүмкіндіктер ұсынылды.