Ұлттық банк Қазақстандағы инфляцияның келешегін бағалады

Ұлттық Банк басшысының айтуынша, өткен жылы ел үшін басты экономикалық сын-қатер инфляция болды.

"Ұлттық банк Үкіметпен бірлесіп инфляциялық үрдістерді өзгерте алды және бағаның өсуін бәсеңдетуге қол жеткізді. Инфляцияны төмендету үшін Ұлттық банк ақша-кредит саясаты шараларын, макропруденциалдық құралдарды және басқа да шаралар кешенін қолданды. Монетарлық шаралардың ықпалын күшейту үшін ең төменгі резервтік талаптар тетігі жетілдірілді және алтын сатып алу операцияларын теңгерімдеу енгізілді. Үйлестірілген әрекеттердің нәтижесінде инфляция өткен қыркүйектегі шамамен 13 пайыздан ағымдағы жылдың мамырындағы 10,4 пайызға дейін баяулады. Биыл біз инфляцияны 9-11 пайыз аралығында болжап отырмыз", - деді Ұлттық банк төрағасы.

Сүлейменов сонымен қатар 5 маусымда базалық мөлшерлеме 18 пайыздан 17 пайызға дейін төмендетілгенін еске салды.

Бұл ретте реттеуші басшысы инфляция үшін тәуекелдер әлі де сақталатынын атап өтті.

"Дегенмен, инфляция әлі екі таңбалы болғандықтан, инфляциялық жағдайдың толық тұрақтануы туралы айтуға әлі ерте. Негізгі тәуекелдер-геосаяси тұрақсыздық және әлемдік азық-түлік бағасының өсуі. Тұрғын үй-коммуналдық қызметтерге тарифтер, жанар-жағармай материалдары саласындағы реформаны қайта бастау және монетарлық базаның өсуі ішкі тәуекел факторлары болып табылады. Инфляцияны тұрақтандырудың маңызды факторы фискалдық шоғырландыру болып табылады. Ұлттық қордан трансферттерді 2,8 триллион теңгеге дейін шектеу маңызды дезинфляциялық фактор болып табылады. Енді республикалық бюджетті шоғырландыруды іс жүзінде іске асыру қажет", — деді Ұлттық банк басшысы.