Қазақстанда фильмдерге прокат алдындағы сараптама жүргізілетін болады

Прокатқа дейінгі сараптама фильмде конституциялық құрылысты күштеп өзгертуді, Республиканың тұтастығын бұзуды, мемлекет қауіпсіздігіне нұқсан келтіруді, әлеуметтік, нәсілдік, ұлттық, діни, тектік-топтық және рулық алауыздықты, қатыгездік пен зорлық-зомбылыққа табынуды, дәстүрлі емес жыныстық бағдарды, педофилияны, сондай-ақ порнографияны насихаттау немесе үгіттеу белгілерінің болуын анықтау үшін жүргізіледі.

Прокатқа дейінгі сараптаманы жүргізу үшін жеке немесе заңды тұлға кинопрокатқа арналған фильмнің нұсқасын уәкілетті органға фильмге интернет-ресурста/материалдық жеткізгіште сілтеме жасау арқылы сұрау салуды алған күннен бастап 5 жұмыс күні ішінде ұсынады.

Прокатқа дейінгі сараптама мыналарды қамтиды:

- фильм көру;
- фильм мазмұнын талдау;
- комиссия отырысында фильмді талқылау;
- комиссия шешімін қабылдау үшін Комиссия мүшелерінің дауыс беруі;
- сараптамалық қорытындысы бар хаттаманы дайындау.

Прокатқа дейінгі сараптаманы жүргізу кезінде:

- фильмнің жалпы мағынасы мен көркемдік ниеті;
- жеке көріністердің сипаты мен қызметі;
- заңсыз мазмұнның болуы немесе болмауы;
- болжамды аудиторияның жасы.

Прокатқа дейінгі сараптама фильмнің кинопрокатқа арналған нұсқасы Комиссияның қарауына келіп түскен күннен бастап 10 жұмыс күні ішінде жүргізіледі.

Комиссия шешімі Комиссия отырысына қатысып отырған мүшелер санының жай көпшілік даусымен қабылданады және Комиссия төрағасы мен хатшысы қол қоятын хаттамамен ресімделеді. Дауыстар тең болған кезде төрағаның дауысы шешуші болып табылады.

Комиссияның шешімі ұсынымдық сипатта болады және оны уәкілетті орган прокаттау куәлігін беру не беруден бас тарту туралы шешім қабылдаған кезде пайдаланады.

Бұйрық 2026 жылғы 16 маусымнан бастап қолданысқа енгізіледі.