Қазақстандық оқушылар Бразилиядағы химия пәнінен Халықаралық Менделеев олимпиадасында ел атынан қатысады

Фото: ©El.kz/Марина РУЗМАТОВА / ChatGPT

11 Мамыр, 202521:06 el.kz

5-13 мамыр аралығында Бразилияның Белу-Оризонти қаласында химиядан 59-шы Халықаралық Менделеев олимпиадасы өтіп жатыр, деп хабарлайды АА El.kz ҚР Білім министрлігіне сілтеме жасай отырып.

Беделді жарысқа әлемнің 40 елінен, соның ішінде Қазақстаннан келген оқушылар қатысады. Ұлттық құраманы 2024-2025 оқу жылындағы химия бойынша республикалық олимпиаданың 11 жеңімпазы ұсынады. Командаға "Білім-Инновация" лицейлерінің, Назарбаев Зияткерлік мектептерінің, Haileybury Almaty жекеменшік мектебінің және дарынды балаларға арналған №8 Павлодар мектеп-лицейінің оқушылары кірді.

Тақырып бойынша сілтемелер11 МамырҚазақстандық тауарлар Қытай тұтынушылары арасында танымал болып келеді

Қазақстан құрамасы: Данияр Базарбай, Аңсар Жақсылықов, Әлихан Серікұлы, Меңдіғали Қалдыбай, Арен Теңізбаев, Санжар Қалиақбар, Әбілмансұр Қали, Айзере Жеңісханова, Нұрқожа Омарбаев, Райымбек Ғабдолла және Ярослава Кравчук.

Қатысушыларды даярлауды және команданы сүйемелдеуді тәжірибелі тәлімгерлер — Елдана Бақытжан мен Әзім Аманжолов қамтамасыз етеді.

Олимпиадаға екі теориялық тур және бір практикалық (эксперименттік) тур кіреді. Бұл жалпы, бейорганикалық, органикалық, аналитикалық және физикалық химия салаларында оқушылардың білімін тексеретін күрделі көп сатылы сынақ.

Менделеев олимпиадасы дәстүрлі түрде Біріккен Араб Әмірліктерінде 2025 жылдың 5-14 шілдесінде өтетін Халықаралық химиялық олимпиадаға (IChO) іріктеу мен дайындықтың маңызды кезеңі болып саналады.

Қазақстандық команданың осындай халықаралық жарыстарға қатысуы елдің жаһандық білім беру кеңістігіндегі позициясын нығайтып қана қоймай, болашақ ғылыми элитаны қалыптастырады.