2025 жылы қанша қазақстандық әскери жиынға шақырылады

"2025 жылы 3000 әскери міндеттілерді әскери жиындарға шақыру", — делінген бұйрықта.

Әскери жиындар-әскери міндеттілер мен азаматтардың әскери білімді игеруі және жетілдіруі мақсатында, сондай-ақ Қазақстан Республикасының заңдарында көзделген өзге де жағдайларда әскери басқару органдары, әскери даярлық жөніндегі уәкілетті мемлекеттік органдар өткізетін іс-шаралар.

Әскери жиындардың негізгі мақсаты бейбіт уақытта қысқартылған санда ұсталатын әскери бөлімдердің жауынгерлік және жұмылдыру әзірлігін арттыру, оларды әскери уақытта жинақтау аудандарында жұмылдыру және жасақтау кезінде ҚР Қарулы Күштерін, басқа да әскерлері мен әскери құралымдарын орналастыру үшін қажетті әскери-оқытылған ресурстарды дайындау және запаста жинақтау болып табылады.

Бұл әскери жиындар 2007 жылдан бастап 30 күнге дейін жыл сайынғы негізде өткізіледі.

"Әскери міндеттілер үшін әскери жиындар кезеңінде жұмыс орны мен атқаратын лауазымы сақталады, оларға орташа жалақы, ал жұмыс істемейтіндерге — мемлекет есебінен ең төменгі жалақы төленеді. Әскери міндеттілерді жиындарға және кері тасымалдау темір жол немесе автомобиль көлігімен жүргізіледі, сондай — ақ оларды тамақпен қамтамасыз ету ҚР Қорғаныс министрлігінің қаражаты есебінен жүргізіледі", - деп атап өтті ведомствода.