Жергілікті әкімдіктер балабақшаларда жан басына шаққандағы қаржыландыру нормативтерін өздері белгілейтін болады

Құжат Жергілікті атқарушы органға мектепке дейінгі тәрбие мен оқытуды жан басына шаққандағы қаржыландыру нормативін айқындау жөнінде өз бетінше шешім қабылдау құқығын беруді көздейді.

Мәселен, мектепке дейінгі тәрбие мен оқытуға, техникалық және кәсіптік, орта білімнен кейінгі білім беруге жан басына шаққандағы нормативтік қаржыландыру көлемі рұқсат етілген мәндер, техникалық және кәсіптік, орта білімнен кейінгі білім беру ауқымы шегіндегі коэффициенттерді ескере отырып есептелген мектепке дейінгі тәрбие мен оқытуды қаржыландырудың жан басына шаққандағы нормативінің көлемінен төмен болмайтыны нақтыланады.

Бұл ретте мектепке дейінгі тәрбие мен оқытуды жан басына шаққандағы қаржыландыру нормативін есептеу үшін мектепке дейінгі тәрбие мен оқытуды, орта білім беруді, сондай-ақ оқытудың кредиттік технологиясын ескере отырып, техникалық және кәсіптік, орта білімнен кейінгі білім беруді жан басына шаққандағы нормативтік қаржыландыру әдістемесінде көзделген коэффициенттерді айқындауды жергілікті атқарушы орган қолданыстағы заңнамаға сәйкес дербес жүзеге асыратыны толықтырылды.

Бұдан басқа, түзетулер тұру үшін қосымша ақы коэффициенттерін қайта қарауды көздейді:

- экологиялық апат аймақтарында;
- радиациялық қауіпті аймақтарда.

Бұйрық мектепке дейінгі оқыту және тәрбиелеу ұйымдарын қайта қаржыландыру, бюджет қаражатын үнемдеуді қамтамасыз ету тәуекелдерін жою мақсатында дайындалғаны түсіндіріледі.

Құжат 23 наурызға дейін ашық талқылау үшін "Ашық НҚА" сайтында орналастырылған.