Мүгедектікті белгілеу жөніндегі мемлекеттік қызметтер Қазақстанда жаңа тәсілмен көрсетілетін болады

Мүгедектікті белгілеу бойынша Мемлекеттік қызмет көрсетудің ерекше тетігін енгізу жөніндегі пилоттық жобаны іске асыру туралы бұйрықты ҚР Еңбек және халықты әлеуметтік қорғау министрлігі ҚР Денсаулық сақтау министрлігімен және ҚР цифрлық даму, инновациялар және аэроғарыш өнеркәсібі министрлігімен бірлесіп әзірледі.

"Бұл бірнеше нозология бойынша бұл рәсімді жеңілдетуге мүмкіндік береді", – деп сендірді ҚР ЕХӘҚМ баспасөз қызметі.
Ведомствода сырттай проактивті форматта медициналық-әлеуметтік сараптама жүргізудің ерекше тетігі медициналық құжаттарды бір ғана аумақтан тыс сарапшыға жіберу арқылы мүгедектікті белгілеу рәсімін оңайлатуды көздейтіні нақтыланды.

Бұған дейін бұл рәсім үш сарапшының қатысуымен өткізілген болатын.

Сондай-ақ сырттай проактивті куәландыру кезінде мемлекеттік қызмет көрсету мерзімдері үш күннен бір жұмыс күніне дейін қысқартылатыны хабарланады.

Еңбек министрлігінің мәліметінше, бұл механизм пилоттық жобада үш нозологиялық нысан бойынша ауруларға, жарақаттар мен ақауларға байланысты дене функцияларының қайтымсыз өзгерістері мен бұзылулары кезінде қолданылатын болады:

- аяқтың болмауы және (немесе) ампутациясы;
- Даун ауруы (синдром) ;
- балалардағы мукополисахаридоз.

Бұйрық 2025 жылғы 19 наурызға дейін жария талқылау үшін "Ашық НҚА" порталында орналастырылған.