Қазақстанда қандай мамандар жетіспейді

Мәулен Әшімбаев қазіргі уақытта білікті мамандардың тапшылығы бар екенін, әсіресе инженерлер, техникалық персонал, агрономдар, ветеринарлар және басқа да маңызды мамандықтар сұранысқа ие екенін атап өтті.

"Болашақта бұл үрдіс артады. Еңбек ресурстарын дамыту орталығының болжамы бойынша 2030 жылға дейін ел экономикасына барлық бағыттар бойынша қосымша 1,6 млн адам қажет болады. Қазірдің өзінде Қазақстанға техникалық және кәсіптік білімі бар 900 мыңға жуық маман қажет, ал жоғары білімі бар адамдарға қажеттілік 430 мың адамды құрайды. Еңбек ресурстарына деген жоғары сұраныс құрылыс, ауыл шаруашылығы, өңдеу өнеркәсібі және көлік сияқты негізгі салаларда да қалыптасуда", – деп атап өтті Сенат спикері.

Ол сондай-ақ елдегі әрбір бесінші түлек мамандық бойынша жұмыс істемейтінін айтты. Мәулен Әшімбаевтың пікірінше, кадрларды даярлау жүйесі экономиканың нақты секторының қазіргі заманғы сын-қатерлері мен сұраныстарына толық жауап бермейді.