Бейбіт жиналыстарды өткізу нормалары Конституциялық сотта тағы бір рет түсіндірілді

Конституциялық сотқа тағы бір қазақстандық "Қазақстан Республикасында бейбіт жиналыстарды ұйымдастыру және өткізу тәртібі туралы" Заңның бірқатар нормаларының Конституцияға сәйкестігін қарау жөнінде жүгінді.

Сотта не жауап берді

Конституциялық сотта олар бұл нормаларды тексеріп қойған деп жауап берді.

"Өтініш берушінің өтінішін алдын ала зерделеу қорытындылары бойынша Конституциялық сот Заңның көрсетілген нормалары бұрын тексерілгенін және тексеру қорытындылары бойынша 2025 жылғы 20 қаңтардағы нормативтік қаулы қабылданғанын, онда құқықтық ұстанымдар мен тексеру қорытындылары бойынша шешім егжей - тегжейлі баяндалғанын көрсетті", - делінген жауапта.

Атап айтқанда, нормативтік қаулыда бейбіт жиналыстарға құқық абсолютті емес және Конституцияда көрсетілгендей заңды түрде шартталуы мүмкін делінген.

Конституциялық сот заңда бейбіт жиналыстарды өткізуден бас тарту туралы шешім негізделген және дәлелді болуы керек және заңнамалық тәртіппен шағымдануға болатындығы туралы императивті талап бар екенін атап өтті.

"Сондықтан әрбір нақты жағдайда бейбіт жиналысты өткізуден бас тарту туралы шешім іс - шараның мақсаттарын, өзектілігін, қоғамдық маңыздылығы мен ауқымын, сондай-ақ өзге де объективті факторларды ескере отырып, барлық қолда бар мән-жайлар мен ықтимал тәуекелдерді мұқият талдауға негізделуге тиіс", - делінген құжатта.

Конституциялық сот заңда көзделген құралдар (атап айтқанда, бейбіт жиналысты ұйымдастырушыға жиналыстың өтетін орнын немесе уақытын өзгерту туралы ұсыныс) бейбіт жиналысты ұйымдастырушы мен жергілікті атқарушы орган арасындағы келісу рәсімдері шеңберінде іске асырылатынын көрсетті.

Осылайша, Конституциялық сот белгіленген негіз бойынша бейбіт жиналысты өткізуден бас тарту туралы шешім қабылданғанға дейін жергілікті атқарушы орган мұндай іс-шараны ұйымдастырушыға оны өткізу орнын немесе уақытын өзгерту туралы алдын ала ұсыныс жіберуге міндетті деп шешті.

Осы нормативтік қаулы өзінің заңды күшін сақтайды.