Үздік ғылыми қызметкерлерге арналған сыйлықтар: жаңа марапаттау ережелері

Қағидалар ғылым мен техниканың дамуына үлес қосқан ғалымдарға, ғылыми ұйымдар мен жоғары және (немесе) жоғары оқу орнынан кейінгі білім беру ұйымдарының (ЖЖОКБҰ) ғылыми қызметкерлеріне жыл сайынғы "Үздік ғылыми қызметкер" сыйлығын беру тәртібін айқындайды.

Сыйлық конкурстық негізде беріледі.

Ғылым саласындағы уәкілетті орган өзінің ресми интернет-ресурсында жыл сайынғы "Үздік ғылыми қызметкер" сыйлығын алуға конкурс өткізу туралы хабарландыруды орналастырады.

Конкурсқа қатысу үшін үміткерлер мынадай құжаттарды ұсынады:

қатысуға өтінім;
сыйлықты беруге үміткердің ғылыми жетістіктерін бағалау көрсеткіштеріне сәйкес мәліметтер;
ғылыми ұйымдардың консультативтік-кеңесші органының және жжокбұ-ның қолдаухаты (ұсынымы) ;
жеке басын куәландыратын құжат.

Конкурсқа құжаттарды уәкілетті орган конкурс туралы хабарландыру жарияланған күннен бастап 20 күнтізбелік күн ішінде ақпараттық жүйе арқылы қабылдайды.

Құжаттарында мемлекеттік құпияларды құрайтын мәліметтер немесе "қызметтік пайдалану үшін" және (немесе) "құпия" деген белгілері бар таратылуы шектелген қызметтік ақпарат бар үміткерлер оларды мемлекеттік құпиялар туралы заңнамада белгіленген тәртіппен уәкілетті органға ұсынады.

Конкурстық материалдарды қарау және сыйлықтар беру мәселесі бойынша шешімдер дайындау үшін комиссия құрылады.

Комиссия қазақстандық ғалымдар, уәкілетті органның, ғылым және ғылыми-техникалық қызмет саласындағы салалық уәкілетті органдардың, ғылыми ұйымдардың, жжокбұ және ғылыми қоғамдық бірлестіктердің өкілдерінен кемінде 25 адамнан құралады.

Комиссия мүшелерінің арасынан сыйлықтар алуға ұсынылған жұмыстарды алдын ала қарау үшін ғылым салалары бойынша секциялар құрылады. Секциялар жұмыстарды бағалайды және комиссия айқындаған ғылыми жетістіктерді бағалау көрсеткіштеріне сәйкес әрбір үміткер бойынша қорытынды береді.

Сыйлықты тағайындауға әрбір үміткер ғылыми жетістіктерді бағалаудың мынадай көрсеткіштері бойынша бағаланады:

- ҚР-да танылған ғылыми дәрежесінің болуы;
- уәкілетті орган берген ғылыми атақтың болуы;
- таңдалған ғылыми бағыт бойынша ғылыми жобалар мен бағдарламаларға басшылық жасау;
- таңдалған ғылыми бағыт бойынша ғылыми нәтижелердің болуы және сапасы (рецензияланатын журналдардағы мақалалар және/немесе шолулар, отандық және шетелдік баспаларда жарияланған монографиялар, оның ішінде монографиялардағы тараулар, патенттер және басқалар);
- шетелдік жетекші ғалымдармен бірлесіп таңдалған ғылыми бағыт бойынша беделді халықаралық рецензияланатын журналдарда мақалалардың болуы;
- өткен жылы ЖЖОКБҰ-да бір немесе бірнеше пәндерді оқыту;
- философия докторы (PhD) немесе бейіні бойынша доктор дәрежесі берілген кадрларды даярлау;
- өндіріске енгізу бойынша ғылыми және ғылыми-техникалық қызметтің расталған нәтижелері;
- ғылыми зерттеулердің сапасын, нәтижелілігін және ықпалын арттыруға бағытталған қоғамдық жұмыс.

Әрбір үміткер бойынша секциялардың қорытындылары негізінде Комиссия ғылыми жетістіктерді бағалау көрсеткіштеріне сәйкес балдарды есептейді.

Нәтижелер ғылым салалары бойынша ақпараттық жүйеде үміткерлердің ғылыми жетістіктерін бағалау көрсеткіштерінің балдары бойынша сараланған тізімдер түрінде жеке ресімделеді. Нәтижелер әрбір қатысушы мүшенің қолымен расталған секциялар хаттамасымен бекітіледі және комиссияның қорытынды отырысына қарауға беріледі.

Комиссия секциялардың қорытындылары негізінде оларды алған күннен бастап бес жұмыс күні ішінде уәкілетті органға сыйлықақы беру жөніндегі шешімді енгізеді.

Комиссияның сыйлық беру туралы шешімі қарапайым көпшілік дауыспен қабылданады. Комиссия мүшелерінің дауыстары тең болған кезде төрағаның дауысы шешуші болып табылады.

Конкурс қорытындылары уәкілетті органның интернет-ресурсында орналастырылады.

Конкурс қорытындысы бойынша сыйлықақы иегеріне "ағымдағы жылы "үздік ғылыми қызметкер" жыл сайынғы сыйлығын беру туралы " куәлік беріледі және сыйлықақы иегеріне республикалық бюджет қаражаты есебінен 2 мың АЕК (2025 жылы 7 864 000 теңге) мөлшерінде мемлекеттік сыйлықақы төленеді.

Бұйрық 2025 жылғы 16 қаңтардан бастап қолданысқа енгізіледі.