"Ашықтық қағидаты - барлық ақпаратты ашу" - Ұлттық банк теңгенің жағдайы туралы айтты

Ұлттық банктің мәліметінше, желтоқсан айының қорытындысы бойынша теңге бағамы 2,5 пайызға, бір доллар үшін 525,10 теңгеге дейін әлсіреген.

"Қазақстан қор биржасындағы сауда-саттықтың орташа тәуліктік көлемі бір айда 262 миллион доллардан 254 миллион долларға дейін төмендеді. Сауда-саттықтың жалпы көлемі 5,3 миллиард долларды құрады", - делінген хабарламада.

Бұл ретте желтоқсан айында республикалық бюджетке трансферттерді қамтамасыз ету үшін Ұлттық қордан валютаны сату 900 миллион долларды құрады.

"Ұлттық қордың сату үлесі жалпы сауда көлемінің 17 пайызын немесе күніне шамамен 43 миллион долларды құрады", – делінген хабарламада.

Ұлттық Банк Ұлттық қор қаражатымен операциялар жүргізу кезінде нарықтық бейтараптық қағидаты сақталатынын еске салды, бұл шетел валютасын тұрақты және біркелкі сатуды білдіреді.

Ұлттық банк 2025 жылғы қаңтарда Үкіметтің республикалық бюджетке трансферттер бөлуге арналған алдын ала болжамды өтінімдері бойынша Ұлттық қордан 750-ден 850 миллион долларға дейінгі мөлшерде валюта сатуды күтеді.

"2024 жылдың соңында БЖЗҚ-дағы валюталық активтердің үлесі 40 пайыздан сәл жоғары. Желтоқсан айында Ұлттық Банк зейнетақы активтерінің инвестициялық портфеліне доллар сатып алған жоқ. 2025 жылдың қаңтарында БЖЗҚ-да валюта сатып алу жоспарланбаған", - делінген ақпаратта.

Ішкі валюта нарығында шектеулі ұсыныс кезінде экономикалық агенттер тарапынан шетел валютасына жоғары сұраныс сақталғаны атап өтілді.

"Тұрақсыздандыратын ауытқуларды болдырмау, теңгенің айырбас бағамының артық құбылмалылығын тегістеу мақсатында және шетел валютасын ұсынуды қамтамасыз ету мақсатында желтоқсан айында Ұлттық Банк валюталық интервенциялар жүргізді. Айдың қорытындысы бойынша валютаны сату көлемі 307,6 миллион долларды құрады", – делінген ақпаратта.

Ұлттық банк транспаренттілік қағидаты шеңберінде валюта нарығында жүргізілетін операциялар туралы толық ақпаратты ашуды жалғастырады деп уәде етеді.

"Қысқа мерзімді перспективада теңге динамикасы нарыққа қатысушылардың күтулеріне, тоқсандық салық төлемдеріне, әлемдік нарықтардағы жағдайға және геосаяси жағдайдың өзгеруіне байланысты болады. Ұлттық банк теңгерімсіздіктердің жинақталуын болдырмайтын және алтын – валюта резервтерінің сақталуын қамтамасыз ететін икемді бағам қалыптастыру режимін ұстануды жалғастырады", - деп қорытындылады Ұлттық Банк.