Қазақстанның құқық қорғау органдарында басшы лауазымдарға кандидаттар жоспардан тыс аттестаттаудан өтетін болады

"Заңның негізгі ережелері мен новеллалары құқық қорғау қызметінде цифрлық рейтингті (бәсекеге қабілеттілік көрсеткішін) енгізу болып табылады. Құқық қорғау қызметіне кандидаттың цифрлық рейтингі қызметкерлерді іріктеу және құқық қорғау органдарында басшылық лауазымдарға ұсыну кезінде ескерілетін болады", - деді сенатор Мұрат Қадырбек.

Сондай-ақ, "құқық қорғау қызметі туралы" заңнан құқық қорғау органдары басшылығының Президенттік резерві, құқық қорғау органының кадрлық резерві, құқық қорғау органдары қызметкерлерінің қызметін бағалау туралы нормалар алып тасталады. Депутаттар мұны цифрлық рейтингтің енгізілуімен түсіндірді.

"Заңда қолданыстағы заң бойынша жоспарлы негізде жүзеге асырылатын құқық қорғау органының басшы лауазымдарын атқаратын қызметкерлерді ротациялау мерзімін бес жылда бір рет үш жылға өзгерту, сондай - ақ қызметкерді құқық қорғау органдарында жоғары тұрған басшы лауазымдарға ұсыну үшін жоспардан тыс аттестаттау мен полиграфологиялық зерттеуді енгізу көзделеді", - деп қосты депутат.

Бұл ретте аттестаттаудың міндетті кезеңіне психологиялық-социологиялық зерттеу жүргізу енгізіледі. Ал полиграфологиялық зерттеу құқық қорғау органы басшысының шешімі бойынша жүргізілетін болады.

Сонымен бірге, құжат мемлекеттік әкімшілік қызметке қабылдау кезіндегі шектеулердің негіздері мен мерзімдеріне, сондай-ақ саяси және әкімшілік мемлекеттік қызметшілердің мемлекеттік қызметті тоқтату негіздеріне байланысты мәселелерді құқықтық реттеуді жетілдіреді.

Бұған дейін Мәжілісте құжатта мемлекеттік қызметке қабылдау үшін шектеу мерзімдерін белгілеу ұсынылғаны хабарланған болатын. Атап айтқанда, бір жыл – ҚР заңдарында белгіленген шектеулерді немесе қызметтік әдепті сақтамағаны үшін жұмыстан шығарылған адамдар үшін; екі жыл – тәртіптік теріс қылықтары үшін жұмыстан шығарылған адамдар үшін; үш жыл – әкімшілік сыбайлас жемқорлық құқық бұзушылықтар немесе қылмыстық теріс қылықтар жасаған адамдар үшін; бес жыл – ауырлығы аз және орташа қылмыстар жасаған адамдар үшін. Бұл ретте сыбайлас жемқорлық, ауыр және аса ауыр қылмыстар жасаған адамдар үшін, сондай-ақ қылмыстық топ құрамында қылмыстар жасаған адамдар үшін мерзімсіз шектеу сақталады. Сонымен қатар, атқаратын лауазымының сәйкес келмеуіне немесе кәсіби жарамсыздығына байланысты өкілеттіктері тоқтатылған судьяларға "дереу Мемлекеттік қызметке кіруге"мүмкіндік беріледі.