Қазақстандық ата-аналар балабақшаны өздері таңдайды: Сенат ваучерлік жүйені мақұлдады

Депутат Айнұр Арғынбекова хабарлағандай, тиісті заңмен "Неке (ерлі-зайыптылық) және отбасы туралы" Кодекске, ҚР Азаматтық іс жүргізу кодексіне және ҚР 7 Заңына өзгерістер мен толықтырулар енгізіледі.

"Заңда қаралатын "Неке (ерлі-зайыптылық) және отбасы туралы" Кодекске асырап алушы кәсіптік отбасылар түріндегі балаларды отбасылық орналастырудың жаңа нысаны енгізіледі, олардың қызметінің құқықтық негізі, осы саладағы құқықтық қатынастар субъектілерінің құқықтары мен міндеттері, сондай-ақ асырап алушы кәсіптік отбасылардың қорғаншылық немесе қамқоршылық саласындағы уәкілетті органдармен өзара іс-қимыл тетіктері және басқа да нормалар айқындалады"- деді сенатор.

Азаматтық іс жүргізу кодексіне норма енгізіледі, оған сәйкес өтініш берушінің жұбайы әке болуды анықтаған баланы асырап алған кезде осы балаға қатысты әке болуды растайтын молекулалық-генетикалық сараптаманың қорытындысы қоса берілуге тиіс.

Депутат заңмен 2027 жылғы 1 қаңтардан бастап мектепке дейінгі тәрбие мен оқыту саласында қызмет көрсететін ұйымдарды лицензиялау тәртібі енгізілетінін еске салды.

"Қолданыстағы талаптарға сәйкес мектепке дейінгі ұйымдар жеке тұрған ғимараттарда, жеке үй иеліктерінде, көппәтерлі тұрғын үйлердің алғашқы екі қабатында, сондай-ақ кіріктірілген-жапсарлас үй-жайларда орналасуы мүмкін екенін атап өткен жөн. Сондай-ақ Мектепке дейінгі ұйымдарды көппәтерлі тұрғын үйлерге орналастыру нормативтік техникалық құжаттарда көзделеді. Бұдан басқа, 30 — дан 50-ге дейінгі балалар контингенті аз бейімделген үй-жайларда орналасқан ауылдық жерлердегі мектепке дейінгі ұйымдар нысаналы мақсатын өзгерту мүмкін болмаған жағдайда Жер кодексін бұза отырып жиі жұмыс істейді", - деп атап өтті А.Арғынбекова.

Оның айтуынша, мектепке дейінгі ұйымдар меншік нысаны, жас топтары, баланың даму бағдарламалары бойынша бөлінеді. Осыған байланысты, Білім министрлігіне заңға тәуелді актілерді әзірлеу кезінде барлық мектепке дейінгі ұйымдарға қойылатын талаптардың бірыңғай үлгісін пайдаланбауға, бірақ бұл мәселеге саралап қарауға кеңес берілді.

"Лицензиялаудың жаңа тәртібінде жеке меншік мектепке дейінгі ұйымдардың "көлеңкелі" бизнеске кетуіне жол бермеу үшін материалдық-техникалық базасы, кеңістіктік ортасы, кадр тапшылығы және т.б. жүйелік проблемалары бар шағын жинақталған мектепке дейінгі ұйымдардың мүмкіндіктерін ескеру қажет. Сондай — ақ, лицензиялау рәсімі үшін мектепке дейінгі ұйымдарды іріктеу критерийлерін әзірлеу, онда оларды балабақша таңдаған қызмет бағытына байланысты өзгеруі мүмкін түрлерге бөлуді көздеу қажет", - деді сенатор.

Депутат мектепке дейінгі тәрбие мен оқыту жүйесінде шешілмеген проблемалардың едәуір саны қалыптасқанын атап өтті.

"Осы мәселелердің шешімдерінің бірі барлық мектепке дейінгі ұйымдарды ваучерлік қаржыландыруға жоспарлы ауыстыру болып табылады, мұнда кезекке қоюдан бастап мектепке дейінгі ұйымдарға мемлекеттік тапсырысты төлеуге дейінгі барлық бұрынғы рәсім өзгереді. Ата-аналар мемлекеттік ваучер алып, балабақшаны өздері таңдайды, бұл мектепке дейінгі ұйымдар қызметінің бәсекелестігі мен "ашықтығын" арттырады", — деп толықтырды А.Арғынбекова.