Қоқыс таулары мен ашық люктер: қазақстандықтарға қайда шағымдануға болады

Вице-министр атап өткендей, "Таза Қазақстан" акциясы аясында TazaQazBot Telegram-боты арқылы қала және экология мәселелері туралы өтінім беру сервисі жұмыс істейді.

"Процесс барынша жеңілдетілген: авторизациялау, проблемалық орынның суретін түсіру, мекенжайды көрсету және түсініктеме қалдыру қажет. Өтінім түріндегі барлық ақпарат жергілікті атқарушы органның операторына келіп түседі, ол оны жіктейді және орындаушыны тағайындайды", - деді Әлиев ОКҚ брифингінде.

Өтінімнің санатына байланысты орындаушы тапсырманы орындауы тиіс уақыт автоматты түрде белгіленеді, деп атап өтті вице-министр. Жұмыс аяқталғаннан кейін Орындаушы фотосуретті және қажет болған жағдайда тиісті түсініктемелерді тіркейді.

"Пайдаланушыларға ыңғайлы болу және жауапты орындаушыларды анықтау үшін барлық проблемалық мәселелер 17 санатқа бөлінеді, мысалы, саябақтар мен аллеяларды, жолдарды (трассаларды), аумақтарды тазалау, жарықтандыру, көшелерді абаттандыру, құрылыс және тұрмыстық қоқыстарды шығару, аула алаңдары, кіреберістердің, ғимараттардың қасбеттерінің санитарлық жағдайы, ашық люктер, көгалдандыру,су айдындарын тазарту", - деп атап өтті Әлиев.

Шенеуніктің айтуынша, чат-бот басталғаннан бері 6000-нан астам өтінім келіп түскен.

"Кері байланыс ретінде өтініш беруші рейтингті белгілеу мүмкіндігімен орындаушыны тағайындау және жұмыстарды аяқтау туралы хабарлама алады. Өңірлік белсенділікті анықтауға, өтінімдерді қарау мен орындаудағы нақты жағдайды талдауға болады, сайып келгенде, жүйе өз міндеттерін орындауға және бей - жай қарамайтын азаматтардың өтініштеріне уақтылы ден қоюға жауапты мемлекеттік органдардың рейтингін қалыптастыруға мүмкіндік береді", - деп қорытындылады Жомарт Әлиев.