Қазақстанда суды үнемдеудің жаңа тетіктерін әзірлеу тапсырылды

"Біздің елімізде үлкен су ресурстары жоқ. Суды үнемді жұмсау, бұл мәселеде халықты ғана емес, ең алдымен бизнесті ынталандыру өте маңызды. Сондықтан өңірлердің су үнемдеу технологияларын қолдана отырып, алаңдарды ұлғайту бойынша индикаторларға қол жеткізуі маңызды", — деді Бектенов.

Оның айтуынша, бұған дейін Үкіметте бекітілген жоспарлы индикаторларды төмендеткен облыстар бар, атап айтқанда Жамбыл, Қарағанды және Атырау облыстары. Бірқатар өңірлер жоспарларын орындамады-Қостанай, Шығыс Қазақстан және Жетісу облыстары.

Ол мұндай өңірлерге өз көрсеткіштерін қайта қарауды және оларды орындау бойынша тиісті шаралар қабылдауды тапсырды.

Премьер-министр елімізде су үнемдеу технологияларын қолдану және суды көп қажет ететін дақылдар алқаптарын оңтайландыру жөнінде барынша шаралар қабылдау керектігін айтты.

"Сондай-ақ, вегетациялық кезеңде су бөлу бойынша көрші мемлекеттермен сапалы келіссөздер жүргізудің маңызы зор. Осы мәселелердің барлығы уәкілетті мемлекеттік органдар мен шекаралас өңірлер әкімдіктерінің тұрақты бақылауында болуы тиіс", — деп атап өтті Бектенов.

Министрлер кабинетінің басшысы су ресурстары және ауыл шаруашылығы министрліктеріне өңірлерді сумен қамтамасыз ету жөніндегі іс-қимылдарды нақты үйлестіруді қамтамасыз етуді, келесі вегетациялық кезеңнің басына сапалы дайындық жүргізуді, су қоймаларын толтыру және суару жүйелеріндегі су шығынын азайту бойынша жұмыстар жүргізуді тапсырды.

Отырыста су ресурстарын тиімді пайдалану және оларды үнемдеу, суармалы жерлердің көлемін ұлғайту мәселелері су ресурстары және суару министрлігі тарапынан нақты үйлестіруді талап ететіні атап өтілді. Сондай-ақ, бейінді мемлекеттік органдарға суармалы жерлерде су үнемдеу технологияларын енгізуді ынталандырудың жаңа тетіктерін әзірлеу және судың цифрлық есебін белсенді қолдану тапсырылды.