Қазақстанда жаңа call-орталық құру ұсынылды

Бұл туралы Әбдіқалықов ОКҚ брифингінде айтты.

"Біз елімізде алаяқтыққа күдіктенудің барлық жағдайларын жинайтын жеке call-орталық құруды ұсынамыз. Қазіргі уақытта біз ҰҚК-мен келіссөздер жүргізіп жатырмыз. Менің ойымша, бұл call-орталық мемлекеттік техникалық қызметке негізделуі керек, өйткені онда 1400 тегін нөмірі бойынша қол жетімді компьютерлік инциденттерге ден қою қызметі жұмыс істейді.

Алайда, қазір бұл нөмір тек киберқылмыс мәселелері бойынша қоңырауларды қабылдайды. Адамды алаяқ алдаған кезде, бұл әрқашан сіз ойлағандай киберцидент бола бермейді. Тиісінше, біз қызметкерлерді кеңейтуіміз керек, бұл осы орталық үшін қосымша қаржыландыруды қажет етеді. Бізде 20 миллион азамат және көптеген алаяқтық жағдайлары бар екенін ескерсек, қоңырауларды қабылдау үшін операторлардың айтарлықтай саны қажет болады", - деді комитет төрағасы.

Бұдан әрі, оның айтуынша, call-орталықты Ұлттық Банктің антифрод-орталығымен және байланыс операторларының ұқсас орталықтарымен интеграциялау жоспарлануда. Бұл жағдайда, Әбдіқалықов атап өткендей, азаматтың кез келген сигналы жедел өңделетін болады және күдік болған жағдайда SIM-карта мен мессенджерлердегі аккаунттар бұғатталатын болады.

"Яғни, банктерге белгілі бір нөмірдің алаяққа тиесілі екендігі туралы хабарланады және осы нөмірден кез келген операциялар банктік қосымшаларда тоқтатылады. Біз бұл тапсырмада белсенді жұмыс істеп жатырмыз. Біз мәселені түсінеміз және оны қалай шешуге болатынын білеміз", - деп түсіндірді Руслан Әбдіқалықов.