Қазақстанда Марбург вирусының жағдайлары тіркелген жоқ - Денсаулық сақтау министрлігі

Сархат Бейсенова бұған дейін Дүниежүзілік денсаулық сақтау ұйымында жарқанаттардан адамға жұғуы мүмкін жаңа қауіпті вирустың пайда болуы туралы хабарланғанын еске салды.

"Қазақстанда бұл вирустың жағдайы тіркелген жоқ", – деп сендірді еліміздің бас санитарлық дәрігері.

Оның айтуынша, бұл вирустың табиғи ошақтары оңтүстік, батыс және Орталық Африка болып табылады. Бұл Оңтүстік Африка, Габон, Судан, Конго Демократиялық Республикасы, Либерия, Зимбабве, Гвинея, Кения және Руанда сияқты елдердің аумағы.

"Марбург ауыр ағыммен және жоғары өліммен, геморрагиялық синдроммен сипатталады. Бауырдың, асқазанның, орталық жүйке жүйесінің зақымдалуына әкеледі. Адамдар вирусты жарқанаттардан және науқастан науқасқа жақын байланыста жұқтырады. Егер симптомдар туралы айтатын болсақ, ол жоғары температурамен, қатты бас ауруымен, бұлшықет ауырсынуымен сипатталады. Үшінші күні диарея, іштің ауыруы, жүрек айнуы қосылады. 5-7-ші күні көптеген науқастарда ауыр геморрагиялық симптом бар-қан жоғалту байқалады. Өлім жағдайы 8-9 күнде болады. Бұған дейін қатты қан жоғалту және есін жоғалту болады", – деді спикер.

Бұл елдерге баратындардың барлығына дәрігерлер сақтық шараларын қолдануды ұсынады.

"Сарапшылардың айтуынша, вирус өте қауіпті. Бүгінгі күні оған қарсы вакцина жоқ, емдеу де жоқ, емдеу симптоматикалық болады... Алғашқы белгілер пайда болған кезде медициналық көмекке жүгіну және жеке гигиенаны сақтау қажет", - деп түйіндеді Сархат Бейсенова.