Қазақстанда атом электр станциясын салу консорциум болады: ТЖ жағдайында кім жауапты болады

Елдің заңнамасына сәйкес ядролық қондырғы операторы кез келген ядролық оқыс оқиғалар үшін негізгі азаматтық-құқықтық жауапкершілікте болады.

"Бұл Қазақстан аумағында оператор ретінде тағайындалған компания немесе заңды тұлға станцияны басқару, оның қауіпсіздігін қамтамасыз ету және апат салдарын жою үшін негізгі жауапкершілікке тартылатынын білдіреді", – деп нақтылады министрлік.

Сондай-ақ, Қазақстан ядролық залал үшін азаматтық жауапкершілік туралы конвенцияға және ядролық материалдарды физикалық қорғау туралы конвенцияға қатысады. Бұл халықаралық келісімдер жауапкершілік пен зиянды өтеу шеңберін белгілейді және төтенше жағдайлар кезінде операторлардың міндеттерін анықтайды.

"Консорциумға қатысушылар, соның ішінде технологиялар мен жабдықтарды ұсынатын халықаралық компаниялар да өз өнімдерінің сапасы мен қауіпсіздік стандарттарын сақтауға жауапты. Егер оқиға жабдықтың ақауларынан немесе жеткізушілердің бұзушылықтарынан туындаса, олар келісімшарттардың талаптарына сәйкес зиянды өтеуге міндетті болуы мүмкін", – деп қорытындылады Энергетика министрлігі.