Кейбір мемлекеттік қызметшілерге Қазақстанда бизнеспен айналысуға рұқсат етіледі

Құжат бойынша мемлекеттік функцияларды орындауға уәкілеттік берілген адамдарға теңестірілген адамдардың кәсіпкерлік қызметпен айналысу құқығына шектеу белгілеу туралы норма Конституцияға сәйкес емес деп танылды. 

"Яғни, мемлекеттік қызметшілерге теңестірілген адамдар кәсіпкерлік қызметпен айналыса алады. Оларға РМК-да, коммуналдық кәсіпорындарда, коммуналдық мемлекеттік мекемелерде, оның ішінде мектептер мен ауруханаларда басқару функцияларын жүзеге асыратын тұлғалар жатады. Бұл бірінші басшылар, олардың орынбасарлары, мемлекеттік сатып алу департаменттерінің басшылары, филиалдардың басшылары", - деді Сыбайлас жемқорлыққа қарсы қызмет төрағасының орынбасары Ұлан Сарқұлов Мәжіліс депутаттарының алдында сөйлеген сөзінде. 

Бұл ретте кәсіпкерлік қызмет лауазымдық міндеттерді орындауға кедергі келтірмеуге, олардың қызметтік мүлікті пайдалануына әкеп соқтырмауға және лауазымдық міндеттермен мүдделер қақтығысын туғызбауға тиіс.
Кәсіпкерлік қызметті жүзеге асыруға тыйым салуды мыналарға сақтау ұсынылады: 

• өкілеттіктерін тұрақты негізде жүзеге асыратын аумақтық сайлау комиссияларының мүшелері;
• Ұлттық Банктің қызметшілері;
• Қаржы нарығын реттеу және дамыту агенттігінің қызметшілері;
• "Қазақстанның авиациялық әкімшілігі" АҚ қызметшілері;
• ұлттық холдингтер мен ұлттық компаниялардағы басқарушылар;
• сатып алу саласындағы және бюджеттен қаржыландырылатын жобаларды іріктеуді жүргізетін бөлімшелер.