Қазақстанда дін саласында мамандар даярланады: оқу орындарының тізімі

"Қазақстанда дін саласында мамандар даярлауды жүзеге асыратын 15 теологиялық білім беру ұйымы жұмыс істейді. Бұл оқу орындарында 5,6 мыңнан астам студент оқиды", — делінген комитеттің жауабында.

Дін саласындағы уәкілетті орган өз құзыреті шегінде Қазақстан аумағында құрылған діни бірлестіктердің, миссионерлер мен діни білім беру ұйымдарының қызметін зерделейді және талдайды.

Қолданыстағы заңнамаға сәйкес республикалық және өңірлік діни бірлестіктер өздерінің жарғыларына сәйкес діни қызметшілерді даярлау жөніндегі кәсіптік білім беру бағдарламаларын іске асыратын діни білім беру ұйымдарын құруға құқылы.

"Қазіргі уақытта Қазақстанда дін саласында мамандар даярлауға бағытталған 15 теологиялық оқу орны жұмыс істейді. Олардың 13-і исламдық бағытқа, екеуі христиандық бағытқа ие", - деп атап өтті ведомствода.

Комитеттің мәліметінше, Ислам бағытындағы оқу орындарына "Нұр-Мүбарак" Египет ислам мәдениеті университеті, тоғыз медресе-колледж, Хусамуддин ас-Сығанақи атындағы Ислам институты, Қазақстан мұсылмандары діни басқармасы жанындағы имамдардың біліктілігін арттыру республикалық Ислам институты, сондай-ақ Қожа Ахмет Яссауи атындағы республикалық Ислам имамдарының біліктілігін арттыру институты кіреді.

Христиандық бағыттағы діни білім беру жүйесінде Алматы православиелік теологиялық семинариясы және Қарағандыда "Мария — Шіркеу анасы" Епархияаралық жоғары теологиялық семинариясы жұмыс істейді. Бұл білім беру ұйымдарында теологиялық және діни кадрлар даярлау жүзеге асырылады.

Уәкілетті органның ақпараты бойынша, қазіргі уақытта Қазақстан аумағында басқа діни білім беру ұйымдарын ашуға тіркелген өтініштер жоқ.