Қазақстанда ұлдар 2027 жылдан бастап АПВ ға қарсы егіле бастайды

Құрылтайда "2027-2029 жылдарға арналған республикалық бюджет туралы" заң жобасын ұсына отырып, вице-министр 2027 жылы адами капиталға 10,5 трлн теңге немесе бюджеттің жалпы көлемінің 35% көзделгенін хабарлады. 

Әлеуметтік көмек пен қамтамасыз етуге жұмсалатын шығыстар 6,9 трлн теңгені құрайды. Бұл ретте атаулы тәсіл әлеуметтік қолдауда сақталады, сондықтан көмек бірінші кезекте оған шынымен мұқтаж адамдарға берілетін болады. 

Денсаулық сақтау саласына 2,5 трлн теңге қарастырылған. Қаражат тегін медициналық көмектің кепілдік берілген көлеміне, дәрілік препараттармен қамтамасыз етуге және медициналық сақтандыруға көзделген.

Бейсенбекұлы Үкіметтің міндеті саланы қаржыландыру ғана емес, сонымен қатар аурулардың алдын алу бойынша шаралар қабылдау, сондай — ақ денсаулық сақтау саласындағы нақты көрсеткіштерді жақсарту екенін атап өтті.

Мысалы, 2027 жылдан бастап пилоттық режимде төрт өңірде өкпе обырын ерте анықтауға арналған скринингтің жаңа түрі енгізілетін болады.

"Алдын алу шарасы ретінде 11 жасар ұлдарға адам папилломавирусына қарсы вакцинация да қарастырылған. Қыздарға вакцинация 2025 жылдан бері жүргізіліп келеді",-деді вице-министр.

Сондай-ақ, оның айтуынша, әлеуметтік көмектің атаулылығын арттыру жөніндегі іс-шаралар есебінен 702 млрд теңге оңтайландырылды.

Әлеуметтік төлемдерді индекстеуге, сондай-ақ туу мен өмір сүру ұзақтығының өсуіне байланысты бюджеттен қосымша 739 млрд теңге бағытталатын болады.

Сонымен қатар, алғашқы медициналық-санитарлық көмектің міндетті әлеуметтік медициналық сақтандыру жүйесіне көшуіне байланысты 453 млрд теңге қайта бөлінді.

Сондай-ақ МӘМС-ке мемлекеттік жарналарды есептеу кезінде пайдаланылатын орташа жалақының ұлғаюына байланысты қосымша 185 млрд теңге көзделген.