Қазақстан шытырман оқиғалы туризмді дамыта бастайды

Астанада ҚР Туризм және спорт вице-министрі Мирас Төлебаевтың Adventure Travel Trade Association Халықаралық шытырман оқиғалы туризм қауымдастығының бас директоры Шеннон Стоуэллмен ресми кездесуі өтті. Тараптар шытырман оқиғалы және тұрақты туризмді дамыту перспективаларын, елдің әлеуетін бағалау үшін ATTA халықаралық сараптамасын тартуды, қауіпсіздік және гидтерді дайындау мәселелерін, сондай-ақ Қазақстанды Орталық Азиядағы шытырман оқиғалы туризм үшін негізгі платформа ретінде орналастыруды талқылады.

"Бүгінгі таңда туристер үшін ерекше тәжірибе маңызды: табиғат, мәдениет, белсенді бағыттар. Бұл үшін Қазақстанның әлеуеті зор. ATTA-мен ынтымақтастық бізге бұл жұмысты жүйелі түрде құруға мүмкіндік береді – гидтерді даярлаудан бастап шетелдік әріптестермен ынтымақтастыққа дейін", – деп атап өтті ҚР Туризм және спорт вице-министрі Мирас Төлебаев.

"Kazakh Tourism "ҰК" АҚ Басқарма төрағасы Талғат Ғазизов пен ATTA бас директоры Шеннон Стоуэлл өзара түсіністік туралы Меморандумға қол қойды. Құжат халықаралық ынтымақтастықты нығайтуға, өңірлердің туристік әлеуетін сараптамалық бағалауды жүргізуге, қазақстандық мамандарды оқытуға, шетелдік әріптестер үшін таныстыру турларын өткізуге, сондай-ақ Қазақстанда ATTA ірі халықаралық оқиғаларын өткізу мүмкіндігін пысықтауға бағытталған.

ATTA-ның соңғы зерттеуі бойынша, шытырман оқиғалы туризмнің жаһандық нарығы 2024 жылы 1,16 триллион долларға жетті. Бұл ретте халықаралық саяхатшылардың 67% - ы "open to Adventure" санатына жатады, яғни табиғат, мәдениет және шытырман оқиғалы тәжірибені қамтитын саяхатқа қызығушылық танытуы мүмкін.

Adventure Travel Trade Association-1990 жылы құрылған шытырман оқиғалы туризм саласындағы әлемдегі ең ірі халықаралық қауымдастық. Қауымдастықтың экожүйесіне әлемнің 100-ден астам елінен 30 000-ға жуық маман кіреді және жалпы жаһандық желі туроператорларды, қонақүйлерді, туристік әкімшіліктерді, ұлттық туристік ұйымдарды, DMO-ларды, туристік агенттерді, жабдық өндірушілерді, көлік компанияларын, сақтандыру ұйымдарын, БАҚ және білім беру мекемелерін қоса алғанда, шамамен 100 000 сала өкілдерін біріктіреді. ATTA мүшелері бүкіл әлем бойынша 1300-ден астам ұйым болып табылады.