Қазақстандықтарды ақшалай сыйлықтармен алғашқы республикалық оқу марафонына шақырды

Марафон екі тілдік лигада — қазақ және орыс лигаларында өтеді. Қатысушылар үшін жеті бағыт қарастырылған: 6-10 сынып оқушылары, колледждер мен жоғары оқу орындарының студенттері, педагогтар, отбасылық командалар, мемлекеттік қызметкерлер, сондай-ақ жасына және кәсібіне шектеусіз барлық ниет білдірушілер үшін жеке санат.

Әрбір қатысушыға арнайы құрылған қордан 15 кітап оқуға тура келеді, оған 330 туынды кіреді — 165-тен қазақ және орыс тілдерінде.

Тізімге қазақстандық авторлардың шығармалары, әлемдік классика, заманауи кітаптар, жалпыұлттық дауыс беру қорытындысы бойынша қалыптастырылған "100 кітап" тізіміндегі шығармалар, сондай-ақ әдебиет бойынша Нобель сыйлығының лауреаттарының кітаптары кірді.

Қыркүйектен наурызға дейін қатысушылар кітап оқиды және жеке кабинетте қысқаша шолулар жариялайды. 2027 жылдың наурыз–сәуір айларында соңғы тестілеу және интеллектуалды квиздер өтеді.

Жеңімпаздар қанша алады
Өңірлік кезеңдердің жеңімпаздарына ақшалай сыйлықақылар қарастырылған:

1 орын - 600 мың теңге;
2 орын - 450 мың теңге;
3 орын - 300 мың теңге.

Барлық финалистер дипломдар мен электронды сертификаттар алады.

"Бүгін біз "оқырман ұлт" бірінші республикалық марафонына тіркеуді ашамыз және сол арқылы кітап төңірегінде әртүрлі жастағы, кәсіптер мен мүдделі адамдарды біріктіретін үлкен жалпыұлттық қозғалысқа бастама береміз", — деп атап өтті "Кітап оқитын ұлт – оқырман ұлт" қоғамдық қорының төрағасы Бақытжан Тұрлыбеков.

Жоба Мәдениет және ақпарат министрлігінің қолдауымен жүзеге асырылуда. Оған Қазақстан Жазушылар Одағы, креативті индустрияларды дамыту қоры, kitap платформасы және "Яндекс кітаптар"қосылды.