Қазақстанда дәрігерлерді даярлау жетілдірілуде

Медициналық кадрларды даярлау жүйесін практикалық денсаулық сақтаудың заманауи талаптарын, медициналық білім берудің халықаралық тәсілдерін және денсаулық сақтау жүйесінің қажеттіліктерін ескере отырып жаңғырту ұсынылады. Негізгі өзгерістердің бірі интеграцияланған медициналық білім беру моделін жетілдіру болып табылады.

Жобада:

-бастапқы медициналық-санитариялық көмек (МСАК) және ауылдық денсаулық сақтау жүйесінде жұмыс істеу үшін қажетті құзыреттерді қалыптастыруға бағытталған денсаулық сақтау саласындағы жоғары білім беру бағдарламаларының жалпы білім беретін және базалық пәндерінің оқу бағдарламалары мен циклдерінің мазмұнын күшейту;

- цифрлық құзыреттіліктерді қалыптастыруды және білім беру процесінде жасанды интеллект технологияларын пайдалануды қоса алғанда, білім беру бағдарламаларының құрылымын, мазмұнын жаңарту;

- практикалық дайындықты күшейту;

- интернатура көлемін 70 академиялық кредитке дейін ұлғайту;

- базалық пәндер циклі аяқталғаннан кейін білім мен дағдыларды бағалауды енгізу және тәлімгерлік институтын дамыту.

Дәрігерлерді даярлаудың жаңартылған бағдарламасы практикалық бағытты күшейтуге бағытталған. Жобада кезеңдерді базалық медициналық білімге (5-6 жыл), интернатураға (1 жыл) бөлу көзделген. Жалпы бакалавриат және интернатура бағдарламалары бойынша оқу ұзақтығы 6+1 жылды құрайды.

Интернатураны аяқтағаннан кейін түлектер қосымша алты клиникалық мамандық бойынша дәрігер біліктілігін алады: "терапия", "педиатрия", "Жалпы практика дәрігері", "хирургия", "Акушерлік және гинекология" және "балалар хирургиясы".

Түлектер барлық деңгейдегі амбулаториялық-емханалық ұйымдарда және аудандық деңгейдегі өңірлерде және моноқалаларда орналасқан медициналық ұйымдарда жұмыс істей алады, бұл дәрігерлердің тапшылығын айтарлықтай толықтыруға мүмкіндік береді.

Сонымен қатар, интернатура тәлімгердің тұрақты бақылауымен, жауапкершіліктің нақты шектеулі деңгейімен, дәрігер ретінде жұмыс тәртібімен және медициналық цифрлық жүйелерге қол жеткізу құқығымен клиникалық тәжірибеге айналады.

Министрлік 2027 оқу жылынан бастап өзгерістер енгізілетінін хабарлады, бұл медициналық білім беру ұйымдарына оларды іске асыруға алдын ала дайындалуға, білім беру бағдарламаларын өзектендіруге және қажетті ұйымдастырушылық жағдайларды қамтамасыз етуге мүмкіндік береді.

Бұл шаралар ауруларды диагностикалаудың, емдеудің және алдын алудың жоғары деңгейін қамтамасыз ету, сондай-ақ, әсіресе хирургия, педиатрия және акушерлікте клиникалық қателер қаупін азайту үшін қажетті тиісті клиникалық саладағы құзыреттерді тереңдетіп игеру есебінен дәрігерлерді даярлау сапасын арттыруға мүмкіндік береді.

Жоба 3 қыркүйекке дейін жария талқылау үшін "Ашық НҚА" порталында орналастырылған.