Қазақстандықтар қайырымдылық саласында құрметті атаққа өтінім бере алады

Құрметті атақ қайырымдылықтың дамуына елеулі үлес қосқан қайырымдылық жасаушыларға, қайырымдылық ұйымдарына және еріктілерге беріледі.

Конкурсқа аз қамтылған және көп балалы отбасыларға, ерекше қажеттіліктері бар балаларға, халықтың әлеуметтік осал санаттарына, ардагерлерге, сондай-ақ төтенше жағдайлардан зардап шеккендерге көмек көрсететін ірі әлеуметтік жобаларды іске асырған кандидаттар ұсынылуы мүмкін. Бұдан басқа, ғылым, инновация, білім, мәдениет, өнер, спорт, тарихи және этномәдени мұраны сақтау, жануарларды қорғау және корпоративтік қайырымдылықты дамыту салаларындағы қайырымдылық қызметі ескеріледі.

Өтінімдерді қабылдау 1 тамыздан 1 қыркүйекке дейін жалғасады.

Құжаттарды мемлекеттік органдар, жеке және заңды тұлғалар электрондық түрде ұсынуы не пошта арқылы немесе мәдениет және ақпарат министрлігінің кеңсесі арқылы жіберілуі мүмкін.

Қатысу үшін мыналарды ұсыну қажет:

• белгіленген нысан бойынша ұсыну;
• дипломдардың, грамоталардың және алғыс хаттардың көшірмелері (бар болса);
• үміткер туралы жарияланымдардың немесе оның материалдарының көшірмелері (бар болса);
• әлеуметтік желілердегі параққа сілтеме (бар болса).

Құрметті атақ беруге қайта ұсынуға оны алғаннан кейін кемінде үш жыл өткен соң жол беріледі. Әрбір үміткер қайырымдылық қызметінің бір бағыты бойынша ғана ұсынылуы мүмкін. Жеңімпаздарды мемлекеттік органдар, азаматтық және квазимемлекеттік секторлар өкілдерінің қатысуымен конкурстық комиссия айқындайды.

Естеріңізге сала кетейік, Қазақстанның еріктілік саласындағы тәжірибесі БҰҰ-да жоғары бағаланды.