Бір балаға 50 851 теңге: Қарағанды облысында "Мектепке жол"акциясы басталды

Жыл сайынғы "Мектепке жол" акциясы әр бала оқу жылын ыңғайлы бастауы үшін балаларды мектепке дайындауға көмектесуге арналған. Биыл Қарағанды өңірінің мектептерінде 175 мыңнан астам оқушы, оның ішінде 15 мыңнан астам бірінші сынып оқушылары партаға отырады.

"Акция біздің облыста 1 тамыз бен 30 қыркүйек аралығында өтеді. Іс – шаралар кешені қарастырылған: "балаларға жақсылық бер", "ауыл балаларына-мектепке сыйлықтар", "Отбасы отбасына көмектеседі", "баланы мектепке жинаймыз" қайырымдылық акциялары, сондай-ақ "Түнгі қаладағы балалар" және "Қамқор"профилактикалық рейдтері. Өңірдің барлық қалалары мен аудандарында отандық өндірушілер мен кәсіпкерлердің қатысуымен мектеп жәрмеңкелері ұйымдастырылады", – деп атап өтті облуо басшысының орынбасары.

Мұндай жәрмеңкелерде ата-аналар балаларына мектеп формасын, аяқ киім мен кеңсе тауарларын қол жетімді бағамен сатып ала алады.

Акцияның маңызды бағыттарының бірі мемлекеттік материалдық көмек болып қала береді. Ол көп балалы және аз қамтылған отбасылардан шыққан балаларға, атаулы әлеуметтік көмек алушыларға, жетім балаларға, ата-анасының қамқорлығынсыз қалған балаларға, сондай-ақ төтенше жағдайлардың салдарынан өмірлік қиын жағдайға тап болған балаларға беріледі. Оқушылардың басқа санаттары да қолдау ала алады: мұндай жағдайларда шешімді білім беру ұйымының алқалы органы қабылдайды.

"Өзге санаттарға жатқызу Қазақстан Республикасы Еңбек және халықты әлеуметтік қорғау министрінің бұйрығымен бекітілген Ережелерге сәйкес өмірлік қиын жағдай туындаған кезеңде, бірақ бір тоқсаннан аспайтын мерзімге жүзеге асырылады", – деп нақтылады спикер.

Биылғы жылы көмек тағайындау механизмі де өзгерді. Басты жаңалық-отбасының табысын тексеруді толық цифрландыру.

"Енді ата-аналарға мектепке табыс туралы анықтама беру талап етілмейді. Барлық қажетті ақпарат автоматты түрде ұлттық білім беру деректер базасына "отбасының цифрлық картасы" және мемлекеттік ақпараттық жүйелер арқылы түседі. Осы мәліметтер негізінде жүйе автоматты түрде отбасының табыс деңгейін және мемлекеттік қолдау алу құқығының болуын анықтайды. Бұл көмек тағайындау процесін ашық, жылдам әрі ыңғайлы етеді", - деп түсіндірді Мейіржан Сыздықов.

2026 жылы баланы мектепке дайындауға арналған біржолғы төлем мөлшері 50 851 теңгені құрайды. Қаражат тікелей ата-аналардың немесе заңды өкілдердің банктік шоттарына аударылады, содан кейін отбасы мектеп формасын, аяқ киімді және қажетті керек-жарақтарды өз бетінше алады. Материалдық көмек алу мәселелері бойынша бала оқитын мектеп әкімшілігіне жүгінуге болады.

Соңында білім басқармасы басшысының орынбасары облыс тұрғындарын акцияға қосылуға шақырды.

"Мектепке жол" акциясына қатысу-қиын өмірлік жағдайға тап болған балаларға көмектесу мүмкіндігі. Мектеп керек – жарақтары, киім-кешек, аяқ киім немесе материалдық қолдау баланы жаңа оқу жылына дайындауға маңызды үлес бола алады", - деп атап өтті Мейіржан Сыздықов.

Балаларды мектепке дайындаумен байланысты барлық сұрақтар бойынша сенім телефонына хабарласуға болады: 8 (7212) 50-25-00 және 8 (7212) 50-45-25. Сонымен қатар, Сенім телефондары облыстың барлық білім бөлімдерінде жұмыс істейді, ал ресми сайттар мен әлеуметтік желілердегі беттерде азаматтардың өтініштерін жедел қарау үшін басшылардың байланыстары орналастырылған.