Тоқаевқа Қазақстандағы көлеңкелі схемаларға қарсы күрестің ауқымы ашылды

Кездесу барысында Жанат Элиманов тергеу нәтижелері мен экономикалық қылмыстарға қарсы іс-қимыл, заңсыз кірістерді заңдастыру және қаржылық схемалар бойынша жүйелі жұмыстар туралы хабарлады.

2026 жылдың бірінші жартыжылдығында Агенттік 496 қылмыстық істі тергеуді аяқтады. Жәбірленушілерге 22,6 млрд теңге сомасында залал өтелді. Бұдан басқа, құқық қорғау бөлімшелері 4 трансұлттық топты қоса алғанда, 7 қылмыстық топты бейтараптандырды, сондай-ақ жалпы айналымы 176 млрд теңгеден асатын ақшалай қаражатты заңсыз қолма-қол ақшаға айналдыру бойынша 44 желінің қызметіне жол бермеді.

Сандық құралдарды қылмыстық мақсатта қолданумен күресуге ерекше назар аударылады. Есірткі бизнесі мен алаяқтық қызметтен түскен кірістерді жылыстату үшін пайдаланылған 12 көлеңкелі крипто алмастырғыш жойылды. Сондай-ақ, шоттары арқылы 113 млрд теңгеге операциялар жүргізілген 36 дроппер ұяшығы анықталды.

ТМД-да алғаш рет Агенттік ұялы байланыс операторларының жұмысын имитациялау және фишингтік SMS-ті жаппай тарату үшін арнайы жабдықты қолданған адамдардың қызметін анықтады. Қаскүнемдердің мақсаты азаматтардың дербес деректерін заңсыз алу болды.

Агенттік Төрағасы сондай-ақ бюджет шығыстарының тиімділігі мен ашықтығын мониторингілеу жөніндегі шаралар туралы баяндады. Жүргізілген жұмыстың нәтижесінде жалпы сомасы 279 млрд теңгеге 52 инфрақұрылымдық жоба бойынша негізсіз шығындардың алдын алынды.

Сонымен қатар, ғылыми әзірлемелерді коммерцияландыру кезінде 10 млрд теңгеге мемлекеттік қаражатты ұрлау қаупі анықталды. Жеке медициналық ұйымдарға әлеуметтік медициналық сақтандыру қорынан қаржыландыруды заңсыз алуға мүмкіндік беретін 140 мың азаматты жалған бекіту схемасы да ашылды.

Алдын алу шаралары аясында Агенттік заңсыз ойын бизнесі белгілері бар 9 мың сайт пен аккаунтқа кіруге тыйым салды. Сондай-ақ, жалпы аудиториясы 35 мыңнан асатын 2,3 мың алаяқтық ресурстар мен 25 топтық чат қызметі тоқтатылды.

Халықтың қаржылық сауаттылығын арттыру бойынша жұмыс 245 мыңнан астам азаматты қамтыды.

Жанат Элиманов Қаржы мониторингі саласындағы заңнаманы жетілдірудің арқасында Қазақстан қылмыстық кірістерді жылыстатуға және терроризмді қаржыландыруға қарсы іс — қимыл стандарттарын белгілейтін халықаралық ұйым-ФАТФ-тың төрт негізгі ұсынымы бойынша өз ұстанымын арттырғанын атап өтті.

Кездесу қорытындысы бойынша Қасым-Жомарт Тоқаев Қаржы мониторингі агенттігі қызметінің негізгі бағыттары бойынша бірқатар нақты тапсырмалар берді.