Гонконг Авиакомпаниясы Қазақстанға рейстер ашады

"Қазақстан Республикасының Көлік министрлігі Халықаралық ұшулардың географиясын кеңейту және жаңа шетелдік авиатасымалдаушыларды тарту бойынша тұрақты негізде жұмыс жүргізуде. Осы мақсатта Азаматтық авиация комитетінің төрағасы Салтанат Томпиеваның "Cathay" (Гонконг) авиакомпаниясының Таяу Шығыс бойынша аймақтық менеджері Оливер Коэльо мырзамен кездесуі өтті",-делінген хабарламада. 

Кездесу барысында Оливер Коэльо мырза биылғы 1 тамыздан бастап "Боинг-747" үлгісіндегі әуе кемелерінде аптасына 5 рейске дейін Астана қаласына тұрақты жүк рейстерін ашу жөніндегі авиакомпанияның жоспарлары туралы хабарлады. "Айрбас –330" үлгісіндегі әуе кемелерінде аптасына 3 рейс жиілігімен Гонконг-Алматы.

Салтанат Томпиева қазақстандық тараптың осы жобаларды іске асыруда қажетті көмек көрсетуге дайын екендігін растады.

Сондай-ақ, кездесу қорытындысы бойынша тараптар жүк және жолаушылар рейстерін іске қосу үшін қажетті рәсімдерді орындау бойынша бірлескен жұмысты жалғастыруға, сондай-ақ Қазақстан мен Гонконг арасындағы әуе қатынасын дамыту мәселелері бойынша тығыз өзара іс-қимылды қолдауға келісті.

ҚР Көлік министрлігінде атап өткендей, жаңа рейстердің ашылуы сауда-экономикалық және туристік байланыстарды одан әрі дамытуға, логистикалық мүмкіндіктерді кеңейтуге, сондай-ақ Қазақстан мен Гонконг арасындағы ынтымақтастықты нығайтуға ықпал ететін болады.

"Cathay" - Гонконгтың ұлттық авиакомпаниясы және Азиядағы ең ірі халықаралық авиатасымалдаушылардың бірі. Авиакомпания еншілес бөлімшелерді ескере отырып, шамамен 237 әуе кемесін пайдаланады, 100-ден астам бағыт бойынша жолаушылар тасымалын орындайды."Cathay Cargo" 41 бағыт бойынша тұрақты жүк тасымалдарын жүзеге асырады, сондай — ақ жылына 1,67 млн тоннадан астам жүк тасымалдайды, бұл әлемдегі жетекші авиатасымалдау операторларының қатарына кіреді", - деп атап өтті министрлікте.