Көлік министрлігі Қазақстандағы авиатасымалдау ережелерін жаңартуды ұсынды

Бұйрықтың жобасы "Ашық НҚА" порталында жарияланды және 27 шілдеге дейін жария талқылауда болады.

Құжатқа түсіндірмеде атап өтілгендей, өзгерістер қолданыстағы ережелерді IATA стандарттарына сәйкес келтіру үшін, сондай-ақ азаматтардың көптеген өтініштерін, Алматының Бас көлік прокуратурасы мен авиациялық көлік прокуратурасының ұсыныстарын, сондай-ақ Шымкент авиациялық көлік прокуратурасының наразылығын ескере отырып әзірленді.

Жобада әуе көлігінде жолаушыларды, багажды және жүктерді тасымалдау ережелерін авиатасымалдауды ұйымдастыруға қойылатын негізгі талаптарды айқындай отырып жаңарту ұсынылады.

Атап айтқанда, құжат әуе тасымалы шартын жасасу, билеттерді ресімдеу және брондау тәртібін реттейді.

Сонымен қатар, жолаушылар мен авиакомпаниялардың құқықтары мен міндеттерін, соның ішінде авиабилеттерді қайтару шарттарын нақтылау ұсынылады.

"Мүгедектігі бар адамдарды, кәмелетке толмағандар мен жүкті әйелдерді қоса алғанда, жолаушылар құқығын қорғауға, қызмет көрсету мәселелеріне, сондай — ақ рейстердің кешігуі мен тоқтатылуы кезінде қызмет көрсету тәртібіне ерекше назар аударылды", - делінген бұйрық жобасында.

Сондай-ақ, құжат әуе кемесінің салонында ұлттық музыкалық аспаптар мен жануарларды тасымалдауға қатысты өзгерістерді көздейді.

Көлік министрлігі бұйрық жобасын қабылдау теріс әлеуметтік-экономикалық және құқықтық салдарға әкеп соқпайтынын атап өтті.