Қазақстанда прокурорлардың жаңа өкілеттіктері пайда болды

Негізгі жаңалық инвестициялық омбудсменнің функцияларын Бас прокурорға беру болды. Инвестициялық омбудсменнің қызметін ұйымдастырушылық қамтамасыз етумен Бас прокуратура инвесторларының құқықтарын қорғау комитеті айналысатын болады.

Жергілікті жерлерде инвестициялық жобаларды сүйемелдеуді және инвесторлардың өтініштерін қарауды инвестициялық прокурорлар жалғастырады.

Комитет басқармасының бастығы Гүлнар Қасқарбаева атап өткендей, қабылданған түзетулер прокуратураның инвесторларды қорғау саласындағы өкілеттігін айтарлықтай кеңейтеді. Енді прокурорлар орындалуы міндетті нұсқамалар енгізе алады, инвесторлардың мүддесі үшін сотқа жүгіне алады, бірақ ең бастысы – инвесторлар мен мемлекеттік органдар, квазимемлекеттік сектор субъектілері арасындағы дауларды сотқа дейінгі реттеу үшін алаң құрылады.

"Инвесторларға қатысты негізсіз шешімдердің алдын алуда өзінің тиімділігін дәлелдеген "прокурорлық сүзгі" тетігі қосымша кеңейтілуде. Енді инвесторларға қатысты берілген талап - арыздар мен мемлекеттік органдар қабылдайтын шешімдер ғана емес, сонымен қатар квазимемлекеттік сектор субъектілерінің, оның ішінде келісім-шарттың, келісімнің мерзімін ұзартудан бас тарту туралы шешімдері де прокурормен міндетті түрде келісуге жатады", - деп атап өтті Қасқарбаева.

Прокурордың нұсқаулары мен нұсқамаларын орындамағаны үшін әкімшілік жауапкершілік белгіленеді.

Қабылданған өзгерістер бизнес құқықтарын қорғау кепілдіктерін одан әрі нығайтуға, елдің инвестициялық тартымдылығын арттыруға және инвесторлар үшін неғұрлым болжамды және қауіпсіз ортаны қалыптастыруға бағытталған.