Қазақстанда нотариустардың қызметін бақылау күшейтілуде

Сенат депутаты Нұрлан Бекназаров еске салғандай, нотариат институты азаматтар мен заңды тұлғалардың құқықтары мен заңды мүдделерін қорғауды, сондай-ақ білікті заң көмегін көрсетуді қамтамасыз ететін құқықтық жүйенің маңызды бөлігі болып табылады.

"Нотариустардың қызметі заңды күші бар және сотта қосымша дәлелдеуді талап етпейтін құжаттарды ресімдеумен тікелей байланысты. Бұл азаматтардың мүліктік құқықтарына, олардың дербес деректерін және өзге де заңды мүдделерін қорғауға қатысты. Республикалық нотариаттық палатаның мәліметінше, 2025 жылы елімізде 4 691 нотариус қызмет атқарып, 11,3 миллион нотариаттық іс – қимыл жасаған", - деді Бекназаров.
Оның айтуынша, бұл нотариаттың қоғам өміріндегі маңызды рөлін және оның қызметіне деген жоғары сұранысты көрсетеді.

"Мемлекет басшысы айқындаған реформалар бағытына сәйкес мемлекеттік және қоғамдық институттардың қызметін цифрландыруға, сондай-ақ азаматтардың құқықтарын қорғау тетіктерінің тиімділігін арттыруға ерекше назар аударылады. Осыған байланысты нотариат жүйесін қазіргі заманғы талаптарға бейімдеу, оны құқықтық реттеуді одан әрі жетілдіру, оның қызметінің ашықтығы мен тиімділігін қамтамасыз ету, сондай – ақ оған қоғамдық сенімді нығайту құқықтық мемлекеттің маңызды көрсеткіштерінің бірі болып табылады", - деп қосты сенатор.

Заң нотариаттық қызмет саласындағы мемлекеттік бақылаудың тиімділігін арттыруға және көрсетілетін қызметтердің сапасын жақсартуға бағытталған. Құжатта заңнаманың сақталуына мемлекеттік бақылауды жүзеге асыру тәртібі, сондай-ақ әділет органдарының өкілеттіктері айқындалады.

Бұдан басқа, заң шеңберінде нотариаттық қызметті одан әрі автоматтандыру, ақпараттық қауіпсіздік деңгейін күшейту, сондай-ақ нотариаттық іс-әрекеттер жасау кезінде мүдделер қақтығысына немесе аффилиирленуге әкеп соғуы мүмкін жағдайлардың алдын алу көзделеді.

Атқарушылық жазба жасау рәсімін жетілдіру мақсатында нотариусқа ұсынылатын борышкердің өз берешегін жазбаша тануына қойылатын талаптар нақтыланады.