Бизнес шағымдарынан кейін сауда министрлігі "е-КТРМ" жүйесі бойынша жұмыс тобын құрады

Күн тәртібіндегі басты мәселелердің бірі "е-КТРМ" жүйесінің жұмыс істеуі болды, ол арқылы кәсіпкерлер Еуразиялық экономикалық одақтың талаптарына сәйкестік сертификаттары мен декларацияларын ресімдейді.

Бизнес өкілдері бірқатар техникалық мәселелер туралы хабарлады. Атап айтқанда, кәсіпкерлер жүйеге кіру кезінде қиындықтарға, ЕАЭО бірыңғай тізілімінде құжаттарды көрсетудің кідірістеріне, сондай-ақ рұқсат беру құжаттарына қол қою және тіркеу кезінде іркілістерге тап болды.

Отырысқа қатысушылардың айтуынша, мұндай ақаулар бизнес үшін қосымша шығындарға алып келеді және өнімді жеткізу мерзімдерін бұзу тәуекелдерін тудырады.

Сауда және интеграция министрлігі цифрлық инфрақұрылымды жаңғырту бойынша жұмыстар жүргізіліп жатқанын атап өтті. Ведомство басшысы анықталған кемшіліктерді мүмкіндігінше қысқа мерзімде жоюды тапсырды және жағдайды жеке бақылауға алды.

"Қоғамдық кеңес кәсіпкерлер мен сала қатысушыларының алдында тұрған өзекті мәселелерді ашық талқылау үшін тиімді алаң болып табылады. Дәл осы форматта біз жүйелік проблемаларды жедел анықтай аламыз, практикалық шешімдер таба аламыз және мемлекеттік қызметтердің жұмысын бірлесіп жетілдіре аламыз. Бизнестен түсетін барлық мәселелер мұқият пысықталатын болады", - деді сауда және интеграция министрі Арман Шаққалиев.

Талқылау қорытындысы бойынша кәсіпкерлік қоғамдастықпен өзара іс-қимылды күшейту және ведомствоаралық жұмыс тобын құру туралы шешім қабылданды. Оның құрамына мемлекеттік органдардың, ұлттық аккредиттеу орталығының және "Атамекен" Ұлттық Кәсіпкерлер палатасының өкілдері кіреді.

Сонымен қатар, отырыста отандық өндірушілерді қолдау шаралары, жәрмеңкелік сауданың заманауи форматтарын дамыту, май өнімдерін таңбалау және тұтынушылардың құқықтарын қорғау мәселелері талқыланды.