Қазақстанда жаңа айыппұлдар пайда болуы мүмкін

Үкімет басшысы ҚР ӘҚБтК-нің 434-бабына сәйкес қоғамдық орындарда балағат сөздер айту, жеке тұлғаларды қорлау және басқаларға құрметсіздік білдіретін, қоғамдық тәртіп пен жеке тұлғалардың тыныштығын бұзатын басқа да осындай әрекеттер ұсақ бұзақылықтың құрамын құрайтынын және әкімшілік жауаптылыққа әкеп соқтыратынын атап өтті.

"Мұндай мінез – құлық 20 айлық есептік көрсеткіш мөлшерінде айыппұл салуға немесе қоғамдық жұмыстарға жиырма-алпыс сағат мерзімге тартуға не бес-он бес тәулік мерзімге әкімшілік қамауға алуға әкеп соғады", - деп атап өтті Олжас Бектенов Қазнетте резонанс тудырған трансформациялық тренингтердің бірінің бейнесіне түсініктеме бере отырып.

Премьер бүгінгі таңда "ҚР Әкімшілік құқық бұзушылық туралы кодексіне онлайн-платформалар мен масс-медиа мәселелері бойынша өзгерістер мен толықтырулар енгізу туралы"заң жобасы әзірленгенін атап өтті.

"Заң жобасы ӘҚБтК-нің жоғарыда көрсетілген 434-бабын толықтыру арқылы онлайн-платформаларда балағат сөздер айтқаны үшін әкімшілік жауапкершілікті белгілеуді көздейді. Заң жобасын заң шығарушы орган ағымдағы жылы қарайтын болады (заң шығарушы органға ағымдағы жылдың маусым айында енгізу жоспарлануда)", – деп нақтылады Олжас Бектенов.

Ол кәсіби жаттықтырушылардың біліктілігіне, құзыретіне, біліміне, іскерлігіне және этикалық қағидаттарына қойылатын талаптар №409 "коучингтік қызмет (кәсіби коучинг)"Кәсіби стандартымен белгіленетінін еске салды.

"Кәсіби қызметті жүзеге асыру кезінде жаттықтырушы кәсіби қауымдастық/Федерация жаттықтырушысының Әдеп кодексін сақтауға және адалдық, теңдік және кемсітпеу қағидаттарына сәйкес қызмет көрсетуге жеке жауапты болады. Сонымен қатар, этикалық мінез-құлық даулар мен қақтығыстарды сындарлы шешудің маңызды факторы болып табылады. Ол үшін биылғы жылы медиация институтына деген құрметті қарым – қатынас пен сенімділікті арттыру қағидаттарын сақтауға бағытталған медиаторлардың Әдеп кодексін әзірлеу жүргізілуде", - деді Олжас Бектенов.