Қазақстанда педагогтердің біліктілігін арттыру ережелері жаңартылды

Құжат 12 шілдеден бастап күшіне енетін жекелеген ережелерді қоспағанда, 2026 жылғы 15 маусымнан бастап қолданысқа енгізіледі. Жаңартылған талаптарға сәйкес біліктілікті арттыру курстарын білім беру қызметін жүзеге асыратын және қажетті кадрлық, материалдық-техникалық және цифрлық ресурстары бар ұйымдар жүргізе алады.

Атап айтқанда, оқытушы-жаттықтырушылардың білім беру бағдарламасы бағыты бойынша кемінде үш жыл жұмыс тәжірибесі болуы тиіс. Бұл ретте жаттықтырушылардың кемінде 40%-наук ғылым кандидаты немесе докторы ғылыми дәрежесі, PhD, магистр дәрежесі, "педагог-зерттеуші" немесе "педагог-шебер" біліктілік санаттары болуы не бейінді ұйымдар мен кәсіпорындардың мамандары болуы тиіс.

Сонымен қатар, ұйымдарда қашықтықтан немесе аралас оқыту форматында оқытуды басқару жүйесін (LMS) пайдалану туралы ақпараты бар интернет-ресурс, сондай-ақ санитарлық талаптар мен өрт қауіпсіздігі нормаларына сәйкес келетін тиісті материалдық-техникалық база болуы керек.

Курстар күндізгі, қашықтықтан немесе аралас түрде өткізілуі мүмкін. Күндізгі оқыту жалақыны сақтай отырып, жұмыстан қол үзіп курстардан өтуді көздейді, ал қашықтықтан оқыту форматы еңбек қызметінен қол үзбей оқуға мүмкіндік береді. Қашықтықтан және аралас форматта оқыту LMS жүйесі арқылы жүзеге асырылады, оған тыңдаушының жеке кабинеті, оқу және бағалау материалдары, сабақ кестесі, сондай-ақ педагогтердің курстан кейінгі сүйемелдеу құралдары кіреді.

"Курстардың ұзақтығы кемінде 36 академиялық сағатты құрайды. Бір академиялық сағат 45 минутқа тең", - делінген құжатта.

Қорытынды аттестаттаудан сәтті өткен педагогтарға сертификаттар беріледі. Электрондық сертификаттар QR-кодты қамтуы және педагогтердің бірыңғай дерекқоры арқылы тексеруден өтуі тиіс.

Сондай-ақ, біліктілікті арттыру курстарын өткізетін ұйымдар тиісті тізілімге енгізілуі керек.

Педагогтердің біліктілігін арттыру мемлекеттік бюджет қаражаты есебінен де, өзге де қаржыландыру көздері есебінен де жүзеге асырылады.