Балалардың жазғы демалысы: Білім министрлігінде лагерьлердің әрбір қызметкерінің соттылығын тексеруге уәде етілген

Жұлдыз Сүлейменова биыл алғаш рет білім беру ұйымдарында балалардың сауығуы мен демалысын ұйымдастыру ережелері бекітілгенін атап өтті. Құжатқа сәйкес, сауықтыру орталықтарының жазғы маусымға дайындығын қабылдауға мүдделі мемлекеттік органдар – СЭС, Төтенше жағдайлар қызметі, полиция, әкімдік, білім басқармасы қатысады.

"Демалыс орталықтарында жұмыс істейтін мамандардың сапалық құрамына ерекше назар аударылды: әрбір қызметкердің соттылығы тексеріледі. Мамандардың біліктілігін арттыру үшін курстар мен семинарлар ұйымдастырылды. Жазғы демалысты ұйымдастыруға 120 мың педагог-ұйымдастырушы, сондай – ақ 12 мыңнан астам студент пен еріктілер тартылады", - деп қосты ол.

Оның айтуынша, балалардың жазғы демалысын қауіпсіз және сапалы ұйымдастыру үшін кері байланыс және жедел көмек тетіктері күшейтілген. Атап айтқанда, білім басқармалары жанынан құрылған колл-орталықтар жазғы демалысқа байланысты азаматтардың өтініштері мен мәселелерін қарайды. Сонымен қатар, "111" байланыс орталығы жазғы кезеңде күшейтілген режимде жұмыс істейтін болады.

"Барлық білім беру ұйымдарында балалардың тікелей көмек сұрауына арналған QR-кодтар орналастырылған", – деп атап өтті министр.

Жалпы, Жұлдыз Сүлейменова атап өткендей, жазғы демалыста 11 135 демалыс орталығы жұмыс істейді, ал демалыс және сауықтыру шараларымен 3,2 млн бала қамтылады.

"Балдәурен" және "Бөбек" республикалық орталықтарында халықаралық және республикалық пәндік және IT-олимпиадалардың, шығармашылық және спорттық жарыстардың жеңімпаздары қатарынан 5 мың бала демалады. Өңірлерде осындай қолдау 370 мың Дарынды балаға ұйымдастырылатын болады.

Сонымен қатар, әлеуметтік аз қамтылған отбасылардан шыққан 729 мың бала, ерекше білім беру қажеттіліктері бар 53 мың бала және педагогикалық назарға мұқтаж 17 мың бала демалыспен қамтылады.