Қазақстандықтарды дербес деректердің қауіпсіздігін бұзу туралы хабардар ету қағидалары жаңартылды

Атап айтқанда, ережелер жаңа редакцияда көрсетілген.

Дербес деректердің қауіпсіздігін бұзу туралы хабарлама (құлақтандыру) уәкілетті органға жазбаша немесе электрондық құжат нысанында не қорғау іс-қимылдарының элементтерін қолдану тәсілімен жіберіледі.

Дербес деректердің қауіпсіздігінің бұзылуы анықталған сәттен бастап бір жұмыс күні ішінде меншік иесі немесе оператор уәкілетті органды осы бұзушылық туралы мынадай ақпаратты көрсете отырып хабардар етеді:

- дербес деректерді өңдеуді ұйымдастыруға жауапты тұлғаның байланыс деректері (бар болса);

- бұзушылықты жою үшін қабылданған шаралар;

- субъектілердің кейіннен оларға хабарлама жіберу үшін қажетті дербес деректері: Тегі, Аты, Әкесінің аты, жеке сәйкестендіру нөмірі және ұялы байланыстың абоненттік нөмірі.

Киберқауіпсіздікті қамтамасыз ету орталығы, киберқауіпсіздік инциденттеріне ден қою қызметі, Ұлттық киберқауіпсіздікті үйлестіру орталығы, салалық киберқауіпсіздік орталығы, Киберқауіпсіздіктің компьютерлік инциденттеріне ден қою ұлттық қызметі, Киберқауіпсіздіктің мемлекеттік жедел Орталығы өз құзыреті шегінде олар дербес деректердің қауіпсіздігін бұзушылықты анықтаған сәттен бастап үш сағат ішінде уәкілетті органға осы бұзушылық туралы мынадай ақпаратты көрсете отырып хабарлайды:

- субъектілердің кейіннен оларға хабарлама жіберу үшін қажетті дербес деректері: Тегі, Аты, Әкесінің аты, жеке сәйкестендіру нөмірі және ұялы байланыстың абоненттік нөмірі;

- дербес деректерді, оның ішінде құқықтық, ұйымдастырушылық және техникалық деректерді қорғау үшін қажетті шаралар.

Уәкілетті орган дербес деректердің қауіпсіздігін бұзу туралы хабарламаны алған сәттен бастап бір жұмыс күні ішінде "цифрлық үкімет" операторына мынадай ақпаратты жібереді:

- субъектілердің құқықтары мен заңды мүдделерін бұзудың ықтимал тәуекелдері;

- субъектілерге өздерінің дербес деректерін қорғау үшін ұсынылатын шаралар;

- субъектілердің кейіннен оларға хабарлама жіберу үшін қажетті дербес деректері: Тегі, Аты, Әкесінің аты, жеке сәйкестендіру нөмірі және ұялы байланыстың абоненттік нөмірі;

- дербес деректерді өңдеуді ұйымдастыруға жауапты тұлғаның байланыс деректері (бар болса).

"Цифрлық үкімет" операторы уәкілетті органнан алынған ақпараттың негізінде субъектілерді дербес деректердің қауіпсіздігін бұзу туралы не дербес деректерді өңдеу туралы ақпаратты "цифрлық үкімет" веб-порталындағы жеке кабинетке, "цифрлық үкіметтің" мобильдік қосымшасына немесе олардың ұялы байланыстың абоненттік нөміріне қысқа мәтіндік хабарлама түрінде жіберу жолымен хабардар етуді жүзеге асырады.

Бұйрық 2026 жылғы 12 шілдеден бастап қолданысқа енгізіледі.