Қазақстанда балалар үйірмелері мен даму орталықтарына қойылатын талаптар жаңартылды

Жаңа редакцияда балаларға арналған қосымша білім беру ұйымдары қызметінің үлгілік қағидалары баяндалған. Құқықтық мәртебесі, жұмыс бағыттары, сондай-ақ білім беру бағдарламаларын іске асыруға қойылатын талаптар нақтыланды.

Құжатқа сәйкес, меншік нысанына қарамастан кәмелетке толмағандарға арналған білім беру және білім беру-сауықтыру бағдарламаларын іске асыратын заңды тұлғалар мен заңды тұлға құрмайтын жеке кәсіпкерлер балаларға арналған қосымша білім беру ұйымдары болып танылады.

Мұндай ұйымдардың қызметі жүзеге асырылатын болады:

• хабарламалық тәртіппен-білім беру-сауықтыру қызметтерін көрсетпейтін мекемелер үшін;
• лицензия негізінде — кәмелетке толмағандарға білім беру-сауықтыру қызметтерін ұсынатын ұйымдар үшін.

Қосымша білім беру бағыттарының жіктелуі кеңейтілді. Олардың қатарында ғылыми-техникалық, IT және STEM-бағыттар, цифрлық және қаржылық сауаттылық, жасанды интеллект, әскери-патриоттық, спорттық, көркем-эстетикалық, гуманитарлық және басқа да бейіндер бар. Сондай-ақ, кемінде екі бағытты қамтитын көпсалалы оқыту қарастырылған.

Оқытудың негізгі формалары анықталды — топтық және жеке сабақтар, сонымен қатар күндізгі және қашықтықтан оқыту форматтары. Оқыту тұрақты немесе ауыспалы құрамы бар бір жастағы және әртүрлі жастағы топтарда жүргізілуі мүмкін.

Демалыс уақытында білім беру ұйымдарының базасында күндізгі және тәулік бойы болатын клубтар мен демалыс орталықтарын ашу мүмкіндігі жеке бекітілді.

Қосымша білім беру ұйымдарының негізгі міндеттерінің қатарында балалардың зияткерлік, шығармашылық және дене қабілеттерін дамыту, азаматтық пен патриотизмді, экологиялық мәдениетті қалыптастыру, сондай-ақ мазмұнды бос уақытты ұйымдастыру және қоғамдағы өмірге бейімделу көрсетілген.

Білім беру бағдарламалары балалардың жас ерекшеліктерін, ата-аналардың сұраныстарын және өңірлік ерекшеліктерін ескере отырып әзірленетін болады. Мемлекеттік ұйымдардың бағдарламаларын білім беруді басқару органдары, жекеше ұйымдардың — мекемелер басшылары бекітуге тиіс.

Сондай-ақ ұйымдардың ата-аналармен өзара іс-қимылы, оларды іс-шараларға тарту, сондай-ақ ерекше білім беру қажеттіліктері бар балалармен жұмыс істеу көзделген.

Бұйрықпен балалар музыкалық және көркемсурет мектептері, оқушылар сарайлары, жас натуралистер, техниктер мен туристер станциялары, сондай-ақ Мектепке дейінгі дамыту кешендері қызметінің жекелеген тәртібі бекітілді.

Құжат 2026 жылғы 23 мамырдан бастап қолданысқа енгізіледі.