Қарағанды ЖЭО қыс мезгіліне дайындалуда: қуаттарды жөндеу және кеңейту жоспар бойынша жүріп жатыр

Станциядағы жұмыс барысын Қарағанды облысының әкімі Ермағанбет Бөлекпаев тексерді.

Кәсіпорында хабарланғандай, жөндеу науқаны қазан айына дейін жалғасады және екі жылу электр станциясындағы негізгі жабдықтың 26 бірлігіне бірден әсер етеді. Бұл ретте 3-ЖЭО-да жұмыстар электр энергиясын өндіруді тоқтатпай жүргізіледі. Бүгінгі күні бір қазандық пен бір турбинаны жөндеу аяқталды.

Қазіргі уақытта мамандар № 4 қазандық агрегатын жаңартуға кірісті. "Қарағанды Энергоцентр" ЖШС Бас директоры Флюр Гариповтың айтуынша, бұл кезең ең көп еңбекті қажет ететін және ұзақ кезеңдердің бірі болып табылады, ол шамамен төрт айға созылады.

3-ЖЭО-да жаңа энергоблок салу өңір үшін ерекше маңызға ие. Флюр Гарипов атап өткендей, болашақ қазандық агрегаты ең заманауи экологиялық талаптарға сай болады және тек Қазақстанда ғана емес, ТМД кеңістігінде де баламасы болмайды.

Жоба Қарағанды облысы әкімдігінің қолдауымен және Еуразиялық даму банкінің қатысуымен жүзеге асырылуда. Жаңа энергоблоктың құрылысын 2028 жылы аяқтау жоспарланып отыр.

Нысан пайдалануға берілгеннен кейін станцияның қуаты едәуір артады: электр қуаты – 140 МВт, жылу қуаты – 180 Гкал/сағ. Бұл 400-ден астам тұрғын үй мен әлеуметтік нысандарды жылумен қамтамасыз етуге, сондай-ақ қаланы одан әрі дамыту үшін қажетті қуат резервін құруға мүмкіндік береді.

Жабдықтарды күрделі және ағымдағы жөндеу жоспарланған ЖЭО-1 де назардан тыс қалмайды.

Облыс әкімі келесі жылыту маусымына уақтылы дайындық және инфрақұрылымды жаңғырту басым міндеттер болып қала беретінін атап өтті.

"Қарағандыда жылыту маусымы тұрақты өтті. Бұл станциялар мен "Теплотранзит" ұжымының үйлесімді жұмысы. Қазір жөндеу науқанын сапалы жүргізу маңызды, бұған елеулі қаражат бөлінуде. Біз жұмыс барысын бақылауда ұстаймыз. Сонымен қатар, жаңа энергия блогы салынуда, жұмыс кесте бойынша жүріп жатыр. Бұл маңызды мәселе: қала қосымша қуат алып, алдағы жылдарға тұрақты жылумен қамтамасыз етіледі", - деді Ермағанбет Бөлекпаев.

Материалда Қарағанды облысы әкімдігінің фотосуреті пайдаланылды.