Қазақстанда мүгедектігі бар адамдарға арналған жеті жаңа оңалту орталығын салу жоспарлануда

Министр атап өткендей, бүгінде елдің инклюзивті саясаты кедергілерді жоюға және тең мүмкіндіктерді қамтамасыз етуге бағытталған әлеуметтік және құқықтық модельге негізделген. Заңнамалық және нормативтік-құқықтық база дәйекті түрде жетілдірілуде. 

2030 жылға дейінгі инклюзивті саясат тұжырымдамасы іске асырылуда. Көру қабілеті бұзылған адамдардың баспа ақпаратына қолжетімділігін кеңейту жөніндегі Марракеш шарты ратификацияланды.

Жеке көмекшінің қызметтерін көрсету, әлеуметтік қызметтер порталы арқылы инватакси қызметтерін ұсыну мәселелері заңнамалық реттелді, сондай-ақ мүгедек адамдардың ақпаратқа қол жеткізуін қамтамасыз ету жөніндегі нормалар күшейтілді.

"Бірінші тоқсанның қорытындысы бойынша электрондық дүкендердің мәліметтерін пайдалана отырып, оңалтудың техникалық құралдарының құнын өтеудің кепілдік берілген сомасын айқындау әдістемесі бекітілді. Ағымдағы жылдың соңына дейін арнаулы әлеуметтік қызметтер сапасының стандарттарын арттыруды және инклюзивті жұмыспен қамту мүмкіндіктерін кеңейтуді қамтамасыз ету жоспарлануда", — деп атап өтті Асқарбек Ерсаев.

Еңбек министрлігінің мәліметінше, бүгінде елімізде мүгедектігі бар 752 мыңға жуық адам тұрады, бұл халықтың жалпы санының 3,7% -. құрайды. Олардың шамамен 56% — еңбекке қабілетті жастағы адамдар, 29% — зейнеткерлік жастағы адамдар және 15% - балалар.

Ағымдағы жылы мемлекеттік бюджет пен әлеуметтік сақтандыру қорының жиынтық шығыстары — 1,1 трлн теңгені құрайды.

Министр атап өткендей, негізгі бағыттардың бірі қолжетімді ортаны қалыптастыру болып қала береді. Интерактивті қол жетімділік картасында 43 мыңға жуық нысан тіркелген, олардың 67% - ы толығымен бейімделген. 2026 жылы бұл көрсеткішті 34 мың әкімшілік, коммерциялық және әлеуметтік нысандардың қолжетімділігін қамтамасыз ете отырып, 80% - ға дейін жеткізу жоспарлануда.

"Өңірлік аспектте Жетісу (85%), Батыс Қазақстан (79%) және Алматы (76%) облыстарында қолжетімділік бойынша жоғары көрсеткіштер бар. Бұл ретте жекелеген өңірлер бойынша Маңғыстау облысында (51%), сондай-ақ Ұлытау облысында (44%) артта қалушылық сақталуда. Бұл жерде әкімдіктер тарапынан жұмысты күшейту қажет", - деді Асқарбек Ерсаев.

Сонымен қатар, инфрақұрылымды дамытуға ерекше көңіл бөлінеді. Еліміз бойынша жоғары технологиялық жабдықтары бар ересектер мен мүгедек балаларға арналған барлығы 33 оңалту орталығы жұмыс істейді.

Соңғы екі жылда Семей, Тараз, Кентау және Орал қалаларында төрт жаңа орталық ашылды. Ағымдағы жылдың мамыр айында Атырауда тағы бір орталық ашылады.

"Бір мезгілде жеті орталықтың құрылысы мен жобалау-сметалық құжаттамасын әзірлеу жұмыстары жүргізілуде — Ақмола және Ақтөбе облыстарында, Жетісу облысында және Шымкентте құрылыс, Астанада, Павлодар және Алматы облыстарында ЖСҚ әзірлеу", — деді министр.