Қазақстандағы мемлекеттік қызметшілердің жалақысы әр үш жыл сайын индекстелетін болады

Бейіндік комитеттің қорытындысында атап өтілгендей, құжат Үкіметтің 2025 жылға арналған заң жобалау жұмыстарының жоспарына сәйкес әзірленген.

Заң жобасын әзірлеу мемлекеттік қызметті дамытудың 2024-2029 жылдарға арналған тұжырымдамасы негізінде және Мемлекет басшысының мемлекеттік қызмет жүйесін одан әрі жетілдіруге бағытталған тапсырмаларын орындау мақсатында жүзеге асырылды.

Заң жобасының негізгі міндеттерінің бірі сервис және клиентке бағдарлану қағидаттарына негізделген мемлекеттік қызмет моделіне көшу, мемлекеттік аппаратты кәсібилендіруді, сондай-ақ HR-процестерді цифрландыруды қамтамасыз ету болып табылады.

Мемлекеттік қызметшілерге және олардың лауазымдық міндеттеріне қойылатын талаптар айқындалды. Олардың арасында патриотизм, кәсібилік, ашықтық, этикалық және мінсіз бедел, сондай-ақ құқық бұзушылықтар мен мүдделер қақтығысына төзбеушілік бар.

Сондай-ақ, заң жобасында мемлекеттік қызметтің тартымдылығын арттыруға, сондай-ақ білікті кадрларды тартуға және ұстап қалуға бағытталған бірқатар шаралар көзделген, оның ішінде:

1) еңбекақы төлеу жүйесімен үндестірілген бір лауазым шеңберінде көлденең мансаптық ілгерілеу тетігін енгізу.

"Б" корпусының бір әкімшілік лауазымы шеңберінде лауазымдық деңгейлер белгіленетін болады, тиісінше әрбір деңгей үшін лауазымдық жалақының мөлшері белгіленетін болады. Пилоттық жоба ҚР Мемлекеттік қызмет істері агенттігінде, Әділет және Ұлттық экономика министрліктерінде, Астана қаласы мен Атырау облысының әкімдіктерінде 2 жылға енгізіледі.

2) Үкімет айқындайтын тәртіппен кемінде үш жылда бір рет мемлекеттік қызметшілердің жалақыларын индекстеу тетігін белгілеу;

3) қызмет бойынша бір елді мекеннен екінші елді мекенге ауысқан не мемлекеттік орган ауыстырылған жағдайда тұрғын үй төлемдерін, көтерме жәрдемақыны, олардың мүлкін тасымалдауға арналған шығыстардың өтемақысын беру;

4) ротацияланған, орналастырылған немесе басқа елді мекенге ауыстырылған мемлекеттік қызметшілердің балаларын балабақшаларға кезектен тыс қабылдау;

5) мемлекеттік қызметшілерді тұрғын үймен қамтамасыз ету үшін әзірленген жеңілдетілген тұрғын үй бағдарламаларына қатысу;

6) мемлекеттік қызмет өтілі 25 жылдан кем емес уәкілетті органның мемлекеттік наградасымен немесе ведомстволық наградасымен наградталған мемлекеттік қызметші зейнетке шыққан кезде төрт лауазымдық айлықақы мөлшерінде біржолғы ақшалай сыйақы беру;

7) үстеме жұмыс уақытында, демалыс және мереке күндері жұмыс істегені үшін өтемақы кепілдіктерін белгілеу;

8) мемлекеттік қызметшіге міндетті түрде демалыс кестесіне сәйкес жыл сайынғы еңбек демалысын беру;

9) мемлекеттік қызмет өтіліне, сондай-ақ қысқа мерзімді демалысқа байланысты қосымша ақы төленетін демалыс күндерін ұсыну.

Бұдан басқа, мемлекеттік қызметшінің жұмыс уақыты регламенттелген. Күнделікті жұмыстың ұзақтығы сегіз сағатқа дейін белгіленеді. Қалыпты жұмыс уақыты аптасына 40 сағаттан аспауы керек. Бірінші және екінші топтағы мүгедектігі бар мемлекеттік қызметшілерге аптасына 36 сағаттан аспайтын жұмыс уақытының қысқартылған ұзақтығы белгіленеді.

Жүкті әйелдің, үш жасқа дейінгі баласы (балалары) бар ата-аналардың бірінің, сондай-ақ медициналық қорытындыға сәйкес отбасының науқас мүшесіне күтім жасауды жүзеге асыратын мемлекеттік қызметшінің жазбаша өтініші бойынша толық емес жұмыс уақыты режимі белгіленеді.