ҚР Денсаулық сақтау министрлігі медициналық көмектің сапасын бағалаудың жаңа индикаторларын енгізуде

Тиісті көрсеткіштер емдеу мен профилактиканың тиімділігіне бақылауды күшейту мақсатында әлеуметтік медициналық сақтандыру қорымен шарттар жасасқан барлық өнім берушілерге қолданылатын болады.

Бұл модельге көшу басымдықтардың өзгеруін білдіреді: енді медициналық ұйымдардың жұмысы көрсетілген қызметтер саны бойынша емес, олардың түпкілікті нәтижесі бойынша бағаланады.

Атап айтқанда, негізгі критерийлер пациенттердің шағымдарының санын азайту, халықты вакцинациямен қамту және ауыр сырқаттардан кейін медициналық бақылаудың уақтылы жүргізілуі болады.

Жаңа жүйеде қант диабеті, қанайналым жүйесі және тыныс алу органдарының аурулары сияқты созылмалы патологиялары бар науқастарға ерекше назар аударылады. Азаматтардың осы санаты үшін тұрақты динамикалық бақылауды қамтамасыз етуге және қажетті дәрілік заттарды уақтылы тағайындауға бағытталған қатаң индикаторлар белгіленеді.

Мұндай бақылаудың тиімділігі нақты клиникалық нәтижелермен өлшенеді, соның ішінде қант диабетімен ауыратын науқастарда төменгі аяқтың ампутациясы жағдайларының төмендеуі.

Сонымен қатар, диспансерлік есепте тұрған адамдар арасында шұғыл емдеуге жатқызу санын азайтуға бағытталған мониторинг енгізіледі.

Бағалаудың маңызды элементі стационарлық кезеңнен кейін емдеудің сабақтастығы бойынша бастапқы буынның жұмысы болады. Енді МСАК ұйымдары пациентті инфаркт, инсульт немесе қант диабеті бойынша ауруханадан шыққаннан кейін 15 күн ішінде динамикалық бақылауға қоюды қамтамасыз етуге міндетті.

Емханалар деңгейінде жұмысты күшейту жедел жәрдем қызметінің жұмысына тікелей әсер етуі тиіс. Жаңа индикаторлар тізбесіне тәулік ішінде қайта шақырулар санының азаюы, сондай-ақ учаскелік дәрігерлер бақылауы тиіс созылмалы аурулардың шиеленісуіне байланысты өтініштер санының азаюы енгізілді.

Осы кешенді шараларды енгізу министрлікке медициналық ұйымдардың азаматтардың денсаулығы үшін жауапкершілігін арттырып қана қоймай, объективті цифрлық деректер негізінде сапаны бағалау жүйесінің ашықтығын қамтамасыз етуге мүмкіндік береді.