Қазақстанда интернет-кеңістікке мониторинг жүргізіліп, заңсыз контент үшін жауапкершілікке тартылатын болады

Мониторинг ашық көздерде орналастырылған ақпаратты талдау жолымен жүргізіледі, оның ішінде:

- интернет-ресурстар;
- әлеуметтік желілер;
- мессенджерлер;
- бұқаралық ақпарат құралдары;
- басқа ақпараттық-коммуникациялық платформалар.

Ережелер сонымен қатар заңсыз мазмұнға қол жеткізуді шектеу бойынша шаралар қабылдауды қарастырады.

Мәселен, құқыққа қайшы контентті орналастыру фактісі анықталған жағдайда қаржы мониторингі жөніндегі уәкілетті орган өз құзыреті шегінде:

- қылмыстық құқық бұзушылық белгілері болған жағдайда ҚР Қылмыстық іс жүргізу заңнамасында көзделген шараларды қабылдайды;

- қылмыстық құқық бұзушылық белгілері болмаған кезде материалдарды әкімшілік жауапкершілікке тарту үшін уәкілетті органдарға жібереді;

-телекоммуникация желілерінде заңды күшіне енген сот актілерімен немесе ҚР заңдарымен тыйым салынған немесе таратуға өзгеше түрде шектелген материалдар анықталған жағдайда, оларды одан әрі бұғаттау жөнінде шаралар қабылдау үшін ақпараттық жүйе арқылы бұқаралық ақпарат құралдары саласындағы уәкілетті органға хабарлама жібереді.

Хабарламаны жіберу кезінде қаржы мониторингі жөніндегі уәкілетті орган ақпараттық жүйеде талап етілетін деректердің толық көлемде толтырылуын қамтамасыз етеді: ақпараттық жүйеге енгізілетін мәліметтердің заңдылығы мен негізділігі, олардың құқыққа қайшы екенін растайтын анықталған материалдардың скриншоттары.

Құжат 20 наурызға дейін ашық талқылау үшін "Ашық НҚА" сайтында орналастырылған.

ҚР-да заңсыз контент деп не саналады:

- Зорлық-зомбылыққа, тәртіпсіздікке шақыру және алауыздық.

- Қауіп тудыратын фейктердің таралуы.

- Жеке хат-хабарларды, фотосуреттерді немесе бейнелерді адамның келісімінсіз жариялау.

- Ар-намыс пен қадір-қасиетті қорлау.

- Порнография, әсіресе кәмелетке толмағандардың қатысуымен немесе жеке тұлғаны заңсыз пайдалану.

- Тіркеусіз шетелдік журналистердің қызметі.