Бектенов қолжетімді ипотеканы дамытуды және тұрғын үй құрылысын жеделдетуді тапсырды

Ол Үкіметтің кеңейтілген отырысында Мемлекет басшысы Министрлер кабинеті жұмысының басты мақсаты – қазақстандықтардың өмір сүру сапасына тікелей әсер ететін нақты нәтижелерді белгілегенін еске салды.

"Әрине, құрылыс секторы осы міндетті іске асырудың негізгі драйверлерінің бірі болып табылады. Өткен жылы біз саланың оң қарқыны мен тұрақты дамуын 16% деңгейінде сақтай алдық. 20 млн шаршы метрден астам тұрғын үй пайдалануға берілді, 185 мың отбасы тұрғын үй жағдайларын жақсартты. Қабылданған шаралар кешені азаматтардың мемлекеттік қолдау шараларына қолжетімділігін жеңілдетуге мүмкіндік берді. "Отбасы банкке" ұлттық даму институты мәртебесі берілді, оған тұрғын үй саясатын іске асыруда шешуші рөл бекітілді. Тізімдердің цифрлық форматына көшу адами факторды барынша азайтып, тұрғын үйді есепке алу мен бөлудің ашықтығын арттырды", - деді Бектенов.

Оның айтуынша, жалға берілетін тұрғын үй тетіктері мен мемлекеттік ипотекалық бағдарламалар маңызды рөл атқаруда, ал "Наурыз" және "Наурыз – жұмыскер" бағдарламалары бойынша 233 млрд теңге сомасына 8,5 мыңнан астам қарыз берілді.

"Ағымдағы жылы да құрылыс қарқынын сақтай отырып, тұрғын үйге қолжетімділікті қамтамасыз ету бойынша жұмысты жалғастыру қажет. Өнеркәсіп және құрылыс министрлігіне өңірлердің әкімдіктерімен бірлесіп тұрғын үйді іске қосу жөніндегі жоспарлардың орындалуын қамтамасыз етуді тапсырамын. Бұл ретте мектептер, балабақшалар, ауруханалар құрылысын қоса алғанда, ыңғайлы қалалық ортаны құруға көңіл бөлу маңызды. Тиісті инженерлік-коммуникациялық инфрақұрылымды дамыту озық болуы тиіс. Ірі қалаларда, әсіресе Астана мен Алматыда құрылыс көлемі өсуде. Алайда, моноқалалар мен ауылдарды қолдау туралы ұмытпауымыз керек. Министрлікке және "Бәйтерек" холдингіне әкімдіктермен бірлесіп азаматтарды қолжетімді баспанамен қамтамасыз ету бойынша өңірлік бағдарламаларды іске асыруды жандандыруды тапсырамын",-деді премьер-министр.

Ол құрылыс жұмыстарының сапасын қамтамасыз ету мәселелерін жеке атап өтті.

"Мемлекет басшысы ел халқына Жолдауында құрылыс көлемінің өсуі қауіпсіздік пен сапаға нұқсан келтірмеуге тиіс екенін атап өтті. Өткен жылы құрылыс сапасына қатысты 63 мыңнан астам ресми өтініш келіп түсті. Жаңа құрылыс кодексі осы мәселелерді шешуге бағытталған. Ол бүкіл саланы жүйелі жаңартуды, ескірген нормалардан халықаралық стандарттарға, цифрлық және автоматтандырылған технологияларға көшуді қамтамасыз етеді. Мемлекеттік бақылау күшейтілді. Тексеруші органдарға цифрлық технологияларды қоса алғанда, жаңа құралдардың кең спектрі ұсынылды", - деп толықтырды Олжас Бектенов.

Сондай-ақ, премьер өнеркәсіп және құрылыс және жасанды интеллект министрліктеріне ағымдағы жылдың шілде айының соңына дейін жобаларды сараптау жөніндегі АИ-модульдердің пилоттық режимде жұмыс істеуін қамтамасыз етуді тапсырды.

"Бас және егжей-тегжейлі жоспарларды қала құрылысы кадастрына көшіру бойынша жұмысты жалғастыру қажет. Саланы цифрландыру жөніндегі барлық жоспарларды жеделдету қажет. Біз бүгін осы бағыт бойынша артта қалған өңірлерді атап өттік. Облыс әкімдіктеріне 1 маусымға дейін құжаттарды пысықтауды және оларды цифрлық форматқа жүктеуді тапсырамын", - деді Бектенов.

Үкімет басшысы мемлекеттік тұрғын үй бағдарламаларына жүктемені азайту үшін қол жетімді коммерциялық ипотеканы дамытуды тапсырды. Өнеркәсіп және құрылыс министрлігі Ұлттық банкпен бірлесіп Екінші деңгейдегі банктердің ипотекасын дамыту үшін жаңа тәсілдерді әзірлеуі, ал "Отбасы банкке" – халықтың осал санаттарына қолдауды күшейтуі қажет.

Сондай-ақ министрлікке 1 шілдеге дейін құрылыс кодексі шеңберінде нормативтік актілерді жаңарту және қабылдау тапсырылды. Бұдан басқа, ведомство "Бәйтерек" Холдингімен бірлесіп құрылыс материалдарын өндіру бойынша 38 жобаны уақтылы іске қосуды қамтамасыз етуі қажет.