ҚР-да теміржол және авиациялық инфрақұрылымдағы ауқымды жобалар іске асырылуда

Биыл біз ұзындығы 475 шақырым болатын екі теміржол желісінің құрылысын және 2,9 мың шақырым жолды жаңғыртуды аяқтаймыз. Бұл транзиттік тасымалдар көлемін 60 пайызға арттыруға мүмкіндік береді, ал транзиттік контейнерлік пойыздардың жылдамдығы сағатына 50 шақырымға жетеді. Мысалы, Қытай шекарасынан Каспий теңізіне дейінгі жүктерді жеткізу мерзімі осы жылдың соңына қарай 84 сағаттан 55 сағатқа дейін қысқарады. 11 мың шақырым жолды салу және қайта жаңарту жұмыстары жүргізіледі, - деп атап өтті Олжас Бектенов.

Бұл ретте транзиттік әлеуеттің серпінді дамуын тежейтін бірқатар факторлар белгіленген. Олардың бірі теміржол инфрақұрылымдарының тозуының жоғары деңгейі болып қала береді. Осыған байланысты магистральдық теміржол желісін жаңғырту жөніндегі кешенді бағдарламаны іске асыру Үкіметтің тұрақты бақылауында.

Сондай-ақ, инфрақұрылымды қоса алғанда, авиация саласын дамытуға көңіл бөлінеді.

"Биыл Астана әуежайында екінші ұшу-қону жолағының құрылысын бастаймыз. Екінші жолақты пайдалануға беру 20 жылдан астам уақыт бойы жүргізілмеген біріншісін күрделі жөндеуге кірісуге мүмкіндік береді. Бұл елорда әуежайының өткізу қабілетін төрт есеге, 40 млн жолаушыға дейін арттыруға мүмкіндік береді. Ағымдағы жылдың шілде айында Алматы әуежайының ішкі терминалын қайта жаңарту аяқталады. Өткізу қабілеті 14 миллион жолаушыдан 19 миллионға дейін артады. Ұшу-қону жолағын жаңғырту бойынша құрылыс-монтаж жұмыстары басталады",-деп атап өтті Премьер-министр.

Сондай-ақ, Президенттің тапсырмасы бойынша авиаотынның нарықтық бағасын қалыптастыру үшін жағдайлар жасалған. Нәтижесінде авиациялық отынның бағасы 1,2 мың доллардан шамамен 950 долларға дейін төмендеді. Бұл, Бектеновтың айтуынша, шетелдік авиакомпаниялар үшін Қазақстанның әуе кеңістігінің тартымдылығын арттыруға мүмкіндік берді.