Қарағандыдан Жезқазғанға әуе қатынасы арзанырақ болады

Жарияланған ақпаратқа сәйкес, республикалық бюджеттен тоғыз бағыт бойынша субсидиялар көзделген. Қаржыландырудың жалпы сомасы 1,816 млрд теңгені құрайды. Жолаушылар үшін тарифтер бағытына байланысты бір жаққа 13 мың теңгеден 33 мың теңгеге дейін белгіленген.

Тізімге жыл бойғы рейстер де, жазғы кезеңге арналған маусымдық маршруттар да енгізілген. Маусым мен тамыз аралығында Алматы – Балқаш, Астана – Үржар, Астана – Үшарал, Алматы – Үржар және Алматы – Үшарал рейстерін аптасына жеті рет жиілікпен субсидиялау жоспарлануда. Жекелеген бағыттар бойынша қолдау 12 айға қарастырылған — мысалы, Түркістан – Қостанай, Түркістан – Қарағанды және Жезқазған – Қарағанды.

Азаматтық авиация комитетінің мәліметінше, ең жоғары тариф Түркістан – Қостанай – Түркістан бағытында аптасына екі рет жиілікте бір жаққа 33 мың теңге қарастырылған. Ал Жезқазған – Қарағанды – Жезқазған бағытында аптасына төрт рет жиілікте 13 мың теңге тариф белгіленді.

Жазғы кезеңде, маусымнан тамызға дейін Алматы – Балқаш, Алматы – Үржар, Алматы – Үшарал, сондай – ақ Астана – Үржар және Астана-Үшарал рейстерін аптасына жеті рет 16-20 мың теңге тарифтермен орындау жоспарлануда. Субсидиялаудың ең ірі сомасы Түркістан – Қарағанды – Түркістан бағыты бойынша көзделген – 326 млн теңге.

Конкурсқа қатысуға Қазақстанда тіркелген және пайдаланушы сертификаты бар, тұрақты ішкі коммерциялық тасымалдарды орындауға рұқсаты бар, сондай-ақ салық берешегі жоқ авиакомпаниялар жіберіледі. Жеке шартта бір ай ішінде тұрақты рейстерді қамтамасыз ету үшін қаржы резервінің болуы және сыйымдылығы кемінде 50 орындық әуе кемелерінің болуы (облысішілік маршруттарды қоспағанда) көрсетілген.